Covid-19: Mizoram dinhmun Vei zinga 88.27% chhuak tawh
October 6, Thawhlehni khan Mizoramah Covid-19 vei mi 20 hmuh chhuah a ni a, an zingah civil mi Mizorama kái chhâwng mi pariat an tel. Nimin khan hripui vei tawh lo mi pakua chhuahtir a ni a; Mizorama Covid-19 positive hmuh tawh mi 2,148 aṭangin 88.27% chu chhuahtir an ni tawh.
Covid-19 vei hmuh chhuah tharte chu ZMC laboratory-a hmuh mi pathum, district pali - Lunglei, Serchhip, Lawngtlai leh Saituala TrueNAT laboratory-a hmuh mi 10 leh Rapid Antigen Test hmanga hmuh chhuah mi pasarih an ni. An zingah Covid-19 symptom nei pakhat a awm a, nausen thla hnih mi a tel bawk.
SRH-ZMC Bulletin tarlan danin, nimin khan mi pakua chhuahtir an ni a; covid care centre hrang hrang - Lunglei Pukpui leh Mamit aṭangin pahnih ve ve, Pushpak leh Chhiahtlang aṭangin pakhat ve ve leh, home isolation-a awm mi pathum an chhuak a ni.
Mizorama Covid-19 positive hmuh chhuah tawh chu mi 2,148 an ni a, mipa 1,776 leh hmeichhia 372 an ni. Mi 2,148 zinga mi 1,896 (88.27%) chu hripui lakah an fihlim tawh avangin an chhuak tawh a, enkawl mek mi 252 (11.73%) an la awm. Enkawl mek zingah Covid-19 vei tawh lo an awm nual nia thu dawn a ni bawk.
October 6, Thawhlehnia ZMC laboratory-a RT-PCR hmanga Covid-19 vei hmuh chhuahte chu Chanmari West-a hmeichhia kum 31 leh mipa kum 14 mi leh, Zemabawka mipa kum 31 mi an ni.
Sorkar thuchhuah tarlan danin, Chanmari West-a mite hi Aizawlah mi dang aṭanga kai nia hriat an ni a, Zemabawka mi chu September 30-a Arunachal Pradesh aṭanga rawn haw a ni thung.
Rapid Antigen Test (RAT) hmangin Aizawlah Covid-19 vei mi paruk, mipa pahnih leh hmeichhia pali hmuh chhuah a ni a; an zingah nausen thla hnih mi leh upa kum 70 mi an tel. An vaiin Dawrpui vengah colony khata chengte an ni a, tun hnaiah state pawna zin chhuahna an nei lo. An zinga pakhatin Covid-19 symptom a neih avangin endik an ni a; positive dang pangate erawh chuan symptom an nei lo.
Thawhlehni vêk khan TrueNAT-PCR hmangin Lunglei Civil Hospital-ah hripui vei mi pasarih, Assam Rifles sipai vek, kum 28-55 inkar hmuh chhuah a ni a, Lunglei Kàwmzáwla awmte niin, Covid-19 symptom an nei lo. AR mi pasarihte hi tun hnaia zin chhuahna nei lo vek an ni a, Kàwmzáwla an hmunah an inkài chhâwng nia ngaih a ni.
Serchhipah Uttar Pradesh lam mi mipa kum 33-a upain hripui a vei tih hmuh chhuah a ni a, amah hi NH-54 siamtu Chhingchhipa awm Prem Kram Infracon Pvt.Ltd. hnuaia thawk, quarantine facility-a awm lai a ni.
Lawngtlai District Hospital-ah TrueNAT-PCR hmangin hnam dang mipa kum 31 mi, Intercontinental Consultants and Technocrats hnuaia laboratory technician-in hripui a vei tih hmuh a ni a, amah hi quarantine facility-a awm lai a ni. Saitualah pawh TrueNAT hmangin hnam dang mipa kum 30 mi chu Covid-19 positive a ni tih hmuh chhuah a ni a; amah hi Rajasthan mi, NIDHI Construction-a thawk, quarantine facility a awm lai a ni.
RAT hmangin Lungleiah Covid-19 vei mi pakhat, BSF sipai kum 27-a upa hmuh chhuah a ni a; Uttar Pradesh aṭanga lo lut, quarantine facility-a awm lai niin, symptom a nei lo.
October 6, Thawhlehni khan Mizoramah mi 857-te swab sample endik a ni a, chu'ngte chu ZMC-a endik mi 140, TrueNAT laboratory hmanga district pasariha endik mi 74 leh, RAT hmanga district paruka endik mi 643-te an ni.