Mizoramah tuialhthei a thleng reng; Mipui chî-àina tur a awm lo - AMPEDA

Food, Civil Supplies & Con­su­mer Affairs (FCSCA) department hotu­te chuan, Mizoramah petrol leh diesel a rawn thlen reng thu an sawi a; All Mizoram Petroleum Dealers Association (AMPEDA) hruai­­tute pawh­in tuialh­­theiah mipui tan chî-àina tur a awm loh thu an sawi.

Vanglaini palai zawhna chhángin FCSCA department hotute chuan, Indian Oil Corporation lamin Mizoram harsatna an hriatpui thu an sawi a, "Petrol leh diesel phur an rawn tlàntir ve reng. Mahse, rél kawng chhiat avangin a hma angin a rawn thleng chak lo deuh a ni mai. Mipui tan chî-àina tur a awmin kan hre lo," an ti.

Lumding leh Badarpur inkara rél kawng chhia chu May 10, 2024-ah siamṭhat hman beisei a nih thu sawiin FCSCA hotute chuan, "Rél kawng siamṭhat a nih chuan a ngai angin tuialhthei a rawn thleng leh nghal mai dawn. Tunah pawh petrol leh diesel hi bithliah neiin pek chhuah reng a ni," an ti a; tun dinhmunah chuan khuahkhirh rih a la ṭul thu an sawi a ni.

AMPEDA president K Lalnghakliana chuan Vanglaini palai zawhna chhângin, "Mipui tan chi-àina tur a awm lo. Tuialhthei hralh chhuah danah sorkar thupek angin a felfai thei ang bera kal kan tum a, mipui pawhin zâwm se kan duh. Mizoramah pump a tam ve tawh a, a rawn thlen chhâwk reng a, mipui tan thlaphànna tur a awm lo," a ti.

K Lalnghakliana chuan, rél a thlen theih loh avangin a hma anga thil tih zung zung theih erawh a nih loh thu leh thil buaithlâk a awm loh thu a sawi a, "Silchar-ah lak tur a awm loh avangin Guwahati-a mi lak a ngai a, kal chhung a rei deuh," a ti a; Silchar-a IOC oil depot chu state dangte pawhin an rin a nih avangin state dangte pawhin harsatna an tawh ve thu a sawi.

Tarlan tawh angin, Assam-a Lumding leh Badarpur inkarah rêl kawng a chhiat avangin Silchar-a IOC depot aṭangin tuialhthei lâk theih a ni rih lo a, hei vang hian Mizoram sorkar chuan filling station (petrol pump)-te'n tuialh­thei an pek chhuah theih zat May 2, 2024 khan a bithliah a ni.

Silchar aṭangin tuialh­thei lâk theih a nih loh avang hian Mizoramah petrol leh diesel hralh theih zat bithliah a ni a, Mizorama filling station hrang hrangte chuan tuialhthei mipui nawlpuia hralh (free sale) tur an inneih chhâwk ṭhin a; free sale tihna filling station-ah chuan thui tak tak an intlar ṭhin.