Union Home Ministry-in ramri khâr turin a ti lo - Chief Minister

Chief minister Lalduhoma chuan, India leh Myanmar ramria inkalpawhnate khâr turin sorkar laipuia Ministry of Home Affairs (MHA)-in thupek a chhuah loh thu leh, tun hnaia Assam Rifles-in ramri an khâr chu MHA-in an hriatpui loh thu a sawi.

CM Lalduhoma hian May 3, 2024-a CMO-a press conference a neihah zawhna chhângin, "Assam Rifles khan an lo titawp a, vote thlâk ni denchhen khan. Kan han hriat khan kan zawtfiah a, thuneitu sang aṭanga order kan hmuh angin kan thawk alawm, an ti ta tlat mai a ni," a ti.

Lalduhoma chuan, Mizoram state sorkar hriat loha thil a kal nia lang chu a dik lo tih sawiin, "Chief Secretary ka hrilh vat a, Home Secretary lo zuk zawt la, he thil hi engati nge a lo thlen, engati nge central sorkar hian engmah information min pek loh. Kan state-ah kan hriat loha hetiang thil a thleng hi a dik lo," a ti a; Chief Secretary-in Union Home Secretary a zawhfiah thu a sawi.

Chief Minister chuan, Chief Secretary-in phone-a a zawhfiaha Union Home Secretary-in a lo chhàn dan sawiin, "Ani chuan chutiang thupek kan pe lo reng reng, kan hriatpui lo. Kan lo titawp nghal ang e a ti a, an titawp nghal a ni," a ti.