Congress ṭhalaiin dan loa mi thawn chhuah chhui chian an phût; CM thusawi mak an ti

Mizoram Pradesh Youth Congress Committee (MPYCC) chuan May 4, Inrinni khan Aizawl Press Club-ah thuthar thehdarhtute kàwmin, chief minister Lalduhoma'n The Mizoram Private Placement Agencies (Regulation) Act, 2015 a felhlel ang leh a bilha tho lo anga a sawi chu mak an tih thu an sawi.

MPYCC general secretary R Lalhmingmawia chuan, "Chief minister Pu Lalduhoma hnena lehkha kan thehluh ṭuma a sawi, Mizoram Private Placement Agencies (Regulation) Act, 2015 hi a felhlel, a bilh a tho lo tia a sawi kha mak kan ti hle... He dan hi a felhlel ni loin, kan CM zawk hi a felhlel a ni lo maw tih hi kan zawhna a ni," a ti.

R Lalhmingmawia chuan, Mizoram Private Placement Agencies (Regulation) Act Chapter I, Section 2(h)-ah, 'Private placement agency means a person or body of persons other than a goverment agency, department or organization engaged in the business of providing works to any women as domestic worker beyond the boundaries of Mizoram' tiha 'Beyond the boundaries of Mizoram' tih chu CM-in a la vâwng niin a sawi.

CM-in ‘Placement agency-te'n Mizoram páwn khawi hmunah pawh hna thawk turin thawn chhuah theihna an nei a, chuvangin agency-te hian an duhna hmunah an thawn chhuak thei a, an thiam loh a ni bik lo,' a tih chu Lalhmingmawia chuan, "Hemi issue hi divert (pawhpên) a tumna angah a ngaih theih," a ti.

Lok Sabha inthlana Congress party candidate Lalbiakzama chuan, sorkarin dan a siam dawnin a neitu department-in a duh ang angin a kalpui ngawt thei lo a, Law department-in an endik vek tih a sawi a, "Danah hian kum tling lo thawn chhuah phal a ni lo, a thawn chhuaktute'n dan an bawhchhe chiang em em. Kum tling lo Dubai-a thawn chungchang hi sorkarin chhui se, eng visa nge an pek tihte chhui chiang rawh se," a ti a; chhui chiang a, dan bawhchhetute hrem ngei turin sorkar a phût.

R Lalhmingmawia chuan, agency-te'n Mizoram páwna thawk tur an thawn chhuah theih nan 'Beyond the boundaries of Mizoram' tiin Mizoram sorkarin dan a siam thu asawiin, "India ram páwna hna thawktu tur thawn chhuak a, placement tih chungchang chu India sorkar laipui thu a ni a, Mizoram sorkarin thuneihna a nei lo," a ti a, state sorkarin dan pawh a siam theih loh thu a sawi.

MPYCC General Secretary sawi danin, ram danga thawk tur thawn chhuah chu Indian Constitution-a 7th Schedule hnuaia Union List a ni a, ram páwna hna thawktu thawn chhuak turin Ministry of External Affairs hnuaia Protector General of Emigrants office-ah inziah luh a ngai.

Mizoram Private Placement Agencies (Regulation) Act Section 8(3)-ah hmeichhia, kum 18 tling lo hna thawk tura thawn chhuah khap a nih thu sawiin Lalhmingmawia chuan, "Hmeichhia kum 18 tling lo Dubai-a thawntute hian dan an bawhchhe ngei a ni. Mi dang passport hmanga an kaltir hi dan bawhchhiatna serious tak a ni a, human trafficking a ni bawk. Kum 3 thleng lung-ina khung emaw, Rs 50,000 thleng chawitir emaw, a pahnih emaw hrem theih a ni a, man theih leh bail theih loh a ni," a ti.

R Lalhmingmawia chuan, CM chu dan bawhchhiaa kum tling lo Dubai-a thawntute ṭan zawk anga a lan thu sawiin, "An thlavâng a hauhsak hi a dik lo a, anmahni hum tum anga a ṭawng hi dikna (rule of law) rahbeh tumna ni ngeiin kan hria," a ti bawk.

Dubai-a Mizo hmeichhiate'n harsatna an tawh chungchanga FIR lut chu MNF sorkar laia lut a nih laia tuna an buaipui chauh chhan zawhna chhángin Lalbiakzama chuan, "Khatih kai khan eng dan nge an bawhchhiat a, eng nge an tih kan hriatpui lo a, tuna a lan chhan ber chu jail-a an tàn vang kha niin a lang," a ti. R Lalhmingmawia chuan, "Youtube channel pakhatin a rawn tih aṭang khan mi ṭhenkhatin hma la teh u min ti a, kan zir chian khan a senious kan ti a, kan take care (bawhzui) ta a ni," a ti bawk.