Eirûknaah kan fihlîm zelin kan hria; Hna a ṭha tur a ni kan ti - Lalduhoma

Chief minister Lalduhoma chuan, ZPM minister/MLA-te chu eirûknaah an la fihlîm zel nia an hriat thu leh sorkara hna awmte tu pawhin thawk se, hna ṭha an ngaih pawimawh thu a sawi.

May 3, 2024-a press conference a neihnaah, eirûknaa an fihlìm leh fihlìm loh zawhna chhangin Lalduhoma chuan, "Tunah rih chuan kan la fihlim zel niin kan hria. Fihlîm lote kan lo awm palh a nih chuan engtik lai pawhin action la turin kan inpeih," a ti.

Contract hna chungchang zawhna chhángin Chief Minister chuan, restricted tender, open tender, limited tender, departmental-te chu dan awm sa vek tih a sawi a, "Manual (inkaihhruaina) behchhan a ni a, sorkar inthlak vangin tihdanglam a ngawt a theih loh. CPWD Manual hi keini tihdanglam theih a ni lo," tiin, chu'ngte chu a la kal zel thu a sawi.

Lalduhoma chuan, miin departmental pawhin hna thawk se, an ngaih pawimawh chu hna ṭha a nih thu a sawi a, "ZPM a sorkar chuan departmental work a awm miah lo ang tih hi tuma'n kan sawi lo, khawiah mah kan ziak bawk lo. Mi ṭhenkhatin mi beih nan an hmang a. A pawimawh ber chu hna kan thawk chhe ṭhin kha a ni a, chuvang chuan, hna a ṭha tur a ni kan ti," a ti.

Contractor nih a harsa tih sawiin CM Duhoma chuan, "Contractor nih dan hi tihawlsam tur a ni kan ti a. Class 4-te an awm a, class 5, 6, 7 pawh kan siam mai ang. Contractor ni ngai lo contractor nih duh chu a bul ṭannaa an luh dan hi awlsam taka siam ni se, hetiang lam thawk duh chu contractor-a an in register zung zung theihna kawng i hawng teh ang kan ti a, cabinet approval turin chhawp mek a ni," a ti a, Model Code of Conduct vangin an thil chhawp tam tak a kal muan thu a sawi.

Chief Minister chuan minister pisaa complaint box dah chungchang sawiin, "Adah duh chuan an dah a, dah vek rawh u kan inti ta lem lo. A chhan chu Mipui Aw kan siam a, miin ṭhu chung leh mu chung pawha sorkar an rawn dawr theihna tur a awm tâk avangin. Complaint box hi a duhin an lo siam kan remti tho a, mahse, mahni sitting room aṭanga sorkar dawr theihna tur Mipui Aw kan hawng tawh a, a tâwk kan ti viau," a ti.