Kuminah ruihhlo vanga thi mi 27 zingah heroin vanga thi tam ber

Excise & Narcotics department (END) chhinchhiah danin, kuminah April 12 thleng khan Mizoramah ruihhlo vangin mi 27 an thi a, heroin vanga thi tam berin, kum 22-50 inkar mi vek an ni. Kum 1984 aṭanga kumin April 12 thlengin ruihhlo vangin mi 1,839 an thi tawh.

END chhinchhiah danin, ruihhlo vanga January 1 - April 12, 2024 chhunga thi mi 27-te chu mipa 21 leh hmeichhia paruk an ni a; heroin leh ruihhlo dang tih pawlh vek an ni a, an ruih ṭhin ber chu heroin a ni.

Ruihhlo vanga thi mi 27 zinga 18 chu heroin vanga thi an ni a, mi pariat chu heroin leh ruihhlo dang tih pawlh niin, mi pakhat chu alprazolam leh ruihhlo dang tih pawlh a ni thung.

END-in record a neih chinah kum 1984 khan ruihhlo vanga thi Mizoramah mi pakhat a awm a, kum 1989-ah ruihhlo vanga hmeichhe thi an awm ṭan. Ruihhlo vanga thi an tam ber kum - 2004 khan mi 143 an thi a; kum 2000-ah mi 139, kum 2001-ah mi 101 leh kum 2003-ah mi 136 thi bawkin, kum khat bi zela ruihhlo vanga thi mi 100 chung lam awm kumte a ni a, kum dangah erawh mi 100 an tling lo.

Kum 1984-2024 (April 12) thlengin Mizoramah ruihhlo vangin mi 1,839 an thi tawh a, mipa 1,616 leh hmeichhia 223 an ni. Ruihhlo vanga thite kum zat hi END chuan kum 2000 aṭangin an chhinchhiah ṭan a, ruihhlo vanga thi naupang ber chu kum 14 niin, upa ber chu kum 58 a ni.