Minister-in kawng siam mek a enfiah

Food Civil Supply & Consumer Affairs (FCSCA) minister B Lalchhanzova chuan May 4, Zirtawpni khan Mizoram ei bar lakluhna kawngpui NH no. 6 Bairabi to Aizawl via Sairang Kawngpui tun hnaia PWD in a thuamṭhat hna an thawh chu a hmunah kalin a enfiah.

FCSCA Minister chuan kan hma lawkah furpui kan hma chhawn dawn tih sawiin, "Chumi atan chuan ei leh bar lakluh kawngah department chu theihtawpin a inbuatsaih a ni. chutih mek laiin ei leh bar leh kan mamawh dangte lakluh tur awm mah se, kawngpui ber a ṭhat loh chuan harsatna lian tak kan tawk dawn tho," a ti.

PWD Minister nen inbiain sorkar hmasa hun ata tawh kumtina kan harsatna lian tak NH no.6 kawngpui chhiat vanga harsatna kan tawh thin chu pum pelh turin theihtawpin an inhmakhua tih sawiin B Lalchhanzova chuan, "Supply Minister tan chuan kawngpui a chhiat hian mut a tui thei lo," a ti a, lei a chhia tih thawm hriat chuan rilru a hah nghal ṭhin thu a sawi.

B Lalchhanzova chuan kawngpui chu kan chak lakna leh kan ei bar lakna ber a ni rih tih sawiin, "Chuvangin kawngpui ṭhat leh ṭhat loh hi mutmawh hnarmawhah kan nei lo thei lo. A hmun ngeia PWD-ten ngawrh taka kawngpui siamṭhat hna leh lei siamṭhat hna an thawh hi enpui ve hi ka bat niin ka hria a ni," a ti.