Khaw pahnihah in pahnih a kâng ral

May 3, 2024 (Zirtawpni) zan khan Mamit district-a Chhippui khuaah Zothanga h/o Lalbiakmawii in a kâng a, bungrua chuh hman lohin a kâng ral. Hliappui khuaah pawh nimin zing dar 3 vel khan Biaklawma in Assam type chu bungrua chuh hman lohin a kâng ral bawk.

Thu dawn danin, May 3-a Chhippui khuaa Zothanga in kâng hi zan dar 7 rîk hma deuha kâng ṭan a ni a, thuk aṭanga kâng ṭan nia hriat a ni. In a kan lai hian an fapa Jacob Laldinsanga (4) tih loh chu awm an awm lo a, naupang hi a mutthilh avangin in kâng karah Lalbiakthangi d/o R Ramliana chuan a chhan chhuak a ni. YMA, Chhippui Branch chuan Lalbiakthangi chu an chhuan thu an tarlang. Chhippui khawtlang chuan Inrinni khan Zothanga te chhungkaw in tur hnatlangin an sa nghal a ni.

Hliappui khuaa Biaklawma in hi bati chhit aṭanga kâng ṭan nia hriat a ni a, a kan ṭan laiin inah an fanu chauh a awm a, in a kâng tih a hriat chuan a kan nasat tawh avangin a tlân chhuak nghal. Hliappui khawtlang chuan nimin khan inkhawm loin in sak hnatlang an ko a, VC, tlawmngai pawl leh mi ṭhahemngaite'n in sakna tur hmanrua an tum a ni.