Tun hnaiah thli, ruah leh rial vangin Mizoramah chenna in 368 a chhia

Tun hnaia ruahsur, thlipui tleh leh rial tla avangin Mizoram hmun hrang hrangah chenna in 368 a chhia a, in chhia report a luh belh zel bawk.

Disaster Management and Rehabilitation (DMR) department chhinchhiah danin, tun hnaia thlipui tleh leh rial tla vangin Mizoram hmun hrang hrangah chhiatna a thlen a; chhim lam district - Lunglei, Siaha leh Lawngtlai bakah Hnahthialte pawh tuamin, Serchhipah pawh in chhia a awm nual.

Chhiatna tuar nasa ber chu Khawzawl district a ni a, in 128 a chhia. Hriat theih chinah Sialhâwk khuaah in 68 a chhia a, chu'ng zinga panga chu luah tlak lohin rauhsan a ni. Tlangpui khuaah in 55 a chhe bawk.

Lawngtlai district-ah chenna in 99 a chhia a, a tam zawk chu thawm ṭhata luah zui tlak a ni. Siaha district-ah in 69 a chhia a, Aizawl district-ah in 40 a chhia.

Mamit district-ah chenna in 29 a chhia a, Champhai leh Saitual district-ah chenna in tihchhiat awm mah se, an tuar na lutuk lo. Lunglei district-ah chhiatna nasa lutuk thleng lo mah se, district thuneitute chuan chhiatna tênau 15 a thleng tih thu an dawng.

DMR department-in zonal officer a ruatte chuan an bial chhung ṭheuha chhiatna thlengte an bawhzui a, a ṭul angin tarpauline an pe nghal zel. Tarpauline an pekte chu lungrem chim leh in chung chhiate a ni.