DC-in khuarel chhiatna tuarte a tlawh

Lawngtlai district-a May 2, 2024-a thlipui tleh leh rial tlain chenna in 209 a tichhia a; Hmawngbu leh Tuithumhnar khuaa in chhiatte chu May 4, Inrinni khan Lawngtlai bawrhsap Cheemala Siva Gopal Reddy chuan a enfiah.

Cheemala Siva Gopal Reddy hian village council leh tlawmngai pawl hruaitute nen thli leh rialin in a tihchhiatte a hmunah an tlawh a, thawm ṭhat dan tur an sawiho. Bawrhsap chuan, thli leh rialin in a tihchhiatte chu sorkar aṭanga chhawmdawlna leh ṭanpuina awm thei angte ngaihtuahsak an nih tur thu a sawi. DC hian in chung rangva chhia neitute hnenah ṭanpuina hmasa atan tarpauline a pe nghal.

Sorkar thuchhuah tarlan danin, May 2, 2024-a thli leh rialin Lawngtlai district-a khaw hrang hrangah chenna in 209 a tichhia a, chu'ng zinga 62 chu ráltlânte chenna in/bûk a ni. Tuithumhnar khuaah in 76 chhiain, chu'ng zinga 18 chu ráltlânte chenna a ni a, khaw mala chenna in chhia tamna ber a ni.

Lawngtlai District Disaster Management Authority (DDMA) chuan thli leh rial vanga chenna in chhiat dan chu DMR department-ah preliminary report an thawn tawh.

Fûr laia ruah, thli, rial, ṭêk leh leimin awm thei laka fimkhur tur te, chhiatna thleng thei pumpelh a nih theih nan inhmakhua lâwk tur leh chhiatna thlen thulhah thuneitute hnena hriattir vat ṭhin turin Lawngtlai DDMA chuan mipui an chah a ni.