KHAWTHLIR

Free coaching

Aizawl West-III bialtu MLA VL Zaithanzama chuan a hmalaknaa MS Academy-a MPSC competitive exam hmachhawn tura a thlàwna zirna, Free Crash Course Coaching kalpui chu May 4, Inrinni khan a hawng. MLA leh MS Academy ṭang dunin MPSC Crash Course Coaching an buatsaihah hian Aizawl West-III bial chhung veng hrang hranga mi 141 an inziak lut.

AR-in pistol man

Assam Rifles chuan May 2, 2024 khan Zokhawthar huam chhungah Myanmar ram mi pahnih hnen aṭangin pistol pahnih leh a mu eng emaw zat an man a, dan anga bawhzui turin Zokhawthar Police Station-ah an hlàn.

Tuiah tla hlum

May 4, Inrinni tlai khan Lalnuntluanga (7) s/o Lalnunpuia, Saipûm, Kolasib district chu Serlui Field kàiah a ṭhiante nen an chên laiin a chesual a, a tla hlum a, zan dar 8:45-ah a ruang lak chhuah a ni. Lalnuntluanga hi a pu (a nu pa)-te in Saiphaiah lehkha zirin a awm a, Inrinni zan khan a ruang hi Saipum panpui niin, nimin khan vui a ni.

Damdawi lam dan inzirtir

Lunglei Chief Medical Officer pisaah tun hnai khan Clinical Establishments (Registration& Regulation) Act, 2010 leh Mizoram Clinical Establishments (Register & Regulation) Rules, 2014 hnuaia damdawi-in, clinic, diagnostic labaratory neitute tan online registration chungchang zirhona buatsaih a ni.

MBBS zo tharte duhsakna hlân

Congress party leh MNF party chuan thuchhuah siamin, Zoram Medical College-a MBBS batch hmasa berte'n an zirna zoa an chhuak ta chu an lawmpui thu an tarlang a, duhsakna an hlàn. MNF chuan, "Doctor puitling 95 kan neih tâkah chuan doctor indaih lohna damdawi-in hrang hrangah nasa taka harsatna min phuhrûk ngei kan beisei," an ti. Congress chuan, MIMER (ZMC hming hmasa) din a nih theih nana rim taka thawktu Congress sorkara hotute fakin, "Zirlaite'n result ṭha tak an nei leh a bik takin Mizo ṭhalai 75-te'n MBBS an zir chhuak thei ta hi lawmawm kan tiin Pathian hnenah lawmthu kan sawi," an ti.