Rajya Sabha MP Vena'n MoHFW Secy Rajesh Bhushan a kâwm

Rajya Sabha MP K Vanlalvena chuan October 6, Thawhlehni zan dar 7.30 khan Ministry of Health & Family Welfare secretary Rajesh Bhushan chu a pisaah a kâwm a, RIPANS, Aizawlin harsatna a tawh chungchang a sawipui.

K Vanlalvena tarlan danin, RIPANS-ah contract basis-a thawk mi 91 an awm a, chu'ngte chu an contract term pawtsei lo turin sorkar laipuiin January 2020 khan RIPANS hotute a rawn hriattir a, chuvang chuan contract-a thawkte chu an châwl a ni. Thawktu nghet mi 85 chiah an awm avangin exam pawh buatsaih theih a ni lo.

MoHFW Secretary chuan file khawihtu additional secretary Arti Ahuja a hriattir nghal a; RIPANS harsatna sukiang turin meeting an neih nghal tur thu leh ni 2/3 hnuah Mizoram sorkar an rawn bia ang a, thu thar a awm thuai tur thu K Vanlalvena chu a hrilh.

RIPANS harsatna chungchang hi Health minister Dr R Lalthangliana pawhin kumin August 10 leh September 21 khan MoHFW Secretary leh Joint Secretary-ah a thlen tawh niin MNF party thuchhuah chuan a tarlang.