Health Minister-in sorkar laipui hotute a kâwm
Minister Dr R Lalthangliana chu UNAIDS, Health & Wellness International office leh World Bank hotute hmua USA-a a zin hnuah January 16, 2020 khan New Delhi a thleng a, sorkar laipui hotu hrang hrangte a kâwm nghal.
Dr R Lalthangliana hian January 17, Zirtawpni khan Ministry of Human Resource Development joint secretary (Higher Education) Kamini Chauhan Rattan leh hotu dangte a kâwm a; financial year April 1, 2020 aṭanga ṭan tur RUSA Project III-ah Mizoram college-te tihchangtlunna tur tihhlawhtlin ngei ni se a duh thute, HRD Minister hoa RUSA review meeting emaw conference emaw neih ni se a duh thute a thlen.
Minister hian Union Tribal Affairs minister Arjun Munda leh minister of state for Tribal Affairs Renuka Singh Saruta te an pisaah a kâwm a; Zoram Medical College (ZMC)-a zirlaite tana hostel sakna tur ngaihtuahpui tur leh chumi chungchanga Mizoram Chief Minister-in lehkha a ziah tawhte chu ngai pawimawh turin a ngen. Mizoramin Health & Family Welfare leh Higher & Technical lama infrastructure a mamawh hrang hrangte a rang
lama ngaihtuah turin a ngen bawk.
Dr R Lalthangliana hian Ministry of Small & Medium Enterprises secretary Arun Kumar Panda hmuin, Micro Small Enterprise Cluster Development Programme for Manufacturing Enterprises atan kum 2020-21 chhunga cheng nuai 1,000 dil theihnaah Mizoram chu telh ve turin a ngen. MSME Secretary chuan, February 2020 chhungin Mizorama zin theih a inbeisei thu a lo hrilh.
Health Minister hian Ministry of Ayush joint secretary Roshan Jaggi pawh a hmu nghal a; Roshan Jaggi chuan, Mizorama Ayush Hospital sakna atana state sorkarin project a thehluh tawh chu kum 2020-21 chhunga tihhlawhtlin a nih theih nan theihtawp chhuahpui a lo tiam. Union minister of state for Health Ashwini Kumar Choubey a hmuhnaah Mizoram HFW department-in an mamawhte leh hmalaknate a hrilh bawk.
NITI Aayog member, Institution for Transforming India Committee-a Health leh Higher Education changtu leh Medical Council of India chairman Dr Vinod K Paul hnenah ZMC chungchang, hriselna lam leh zirna sang lama tihchangtlun nana mamawhte a thlen bawk a ni.