RT-PCR test-a negative tawhte Inkhung hrantir a ngai tawh lo

Health & Family Welfare department chuan nimin khan home quarantine atana inkaihhruaina thar an tichhuak a; RT-PCR hmanga swab sample test negative tawhte chu in lama inkhung hran a ngai tawh lo tih an tarlang.

•    Home quarantine phalna nei, symptom nei lote chu an thlen veleh (on arrival) Lengpui Airport leh screening point dangah Rapid Antigen Test (RAT) hmangin swab sample test tihsak an ni ang a, negative-te chu home quarantine phalsak an ni ang.

•    Quarantine-a an awm chhung hian Health department-in home quarantine inkaihhruaina a siamte ṭha taka zawm tur a ni. Mahnia pindana inkhung, mask vuah, kut sil ngun, hand sanitizer hman, social distancing leh invenna dangte quarantine chhung hian uluk takin an vawng tur a ni.

•    mCOVID-19 leh Aarogya Setu app-ah in register vek tur a ni.

•    Home quarantine chhung hian quarantine ṭan ní aṭanga ni 5-10 inkarah RT-PCR hmangin swab test tur a ni a, test result chhuah hma chuan uluk takin inkhung chhunzawm ngei tur.

•    Test result a chhuah a, an negative chuan inkhung chhunzawm a ngai tawh lo a, an hna pangngai an thawk chhunzawm thei tawh ang. Amaherawhchu, mahni hriselna inchîk chhunzawm reng tur a ni a, invenna uluk taka kalpui zel tur a ni.

•    Test positive-te chu sorkar inkaihhruaina angin Covid-19 kaite enkawlnaah an awm ang.

•    Home quarantine laiin bialtu CMO leh local/village task force-te'n an vil zui ang a, quarantine zo tawhte chu bialtu CMO-te'n quarantine completion certificate an pe ang.

•    Mi tu pawh, home quarantine laia Covid-19 sign & symptom nei chu ni 5-10 nghak kher loin, task force/CMO/DCHC/Helpline/ZMC hnena a rang thei ang bera hrilh a, swab sample lak tur a ni.

•    Hriselna lama harsatna neite tan heng Covid -19 Helpline-ah thu thlen theih reng a ni. Phone no. - 102 / 0389-2323336 / 0389 2322336 / 0389 2318336.