
MPSC Chairman hi báng tura nawr chi a ni lo - JC Ramthanga
Mizoram Public Service Commission (MPSC) chairman JC Ramthanga, IAS (Rtd.) chu nimin khan pension-in a chhuak a; amah thlahna inkhawmah, MPSC chairman chu báng tura nawr chi a nih loh thu a sawi.
JC Ramthanga chuan, MPSC chu Indian Constitution-a chuang a nih thu sawiin, "Constitutional body a nih angin chairman leh member-te ruat theih dan leh bàn theih dan tarlan vek a ni. Criminal case vanga Supreme Court-in thiam loh a chantir, báng tlâka a ngaih a, President-in a bàn a nih ngawt loh chuan tu mahin báng tura nawr chi a ni lo," a ti.
Tun hnaia MPSC-in beihna a tawhah thawktute ṭanrualna lawmawm a tih thu sawiin Ramthanga chuan, "Chief Minister meuhin press mite hmaah inquiry report-ah MPSC dik lohna an hmuh loh thu leh report chu sorkarin a pawm tih a sawi kha a lawmawm tak zet," a ti a; MPSC zahawmna humhalh a, a zahawmna leh rintlakna vawng nung zel turin thawktute a chah.
JC Ramthanga chuan, a hun chhunga MPSC-in hmasawnna a neih zawng zawng chu secretary, officer leh thawktute'n nasa taka an ṭawiawm vang a nih thu a sawi a, "Heng hmasawnna hnathawhte hi lehkhabua siam a ni. Thawhhona boruak ṭha tak kan neih avangin ka lawm hle," a ti.
JC Ramthanga hi kum 1989-ah IAS-ah a tling a, Manipur cadre niin, Manipur sorkarah kum 25 chhung leh Mizoram sorkarah kum riat chhung a thawk a, May 31, 2022 khan superanuation pension-in a chhuak. June 21, 2022-ah MPSC chairman hna a zawm a, nimin khan pension-in a chhuak a ni.