MPSC pisa kar 2 chhung khâr vangin sorkar hna thawk tur lâkna a khaihlak

Mizoram Public Service Commission (MPSC) chhui a nih avanga hun eng emaw chen an pisa khàr a nih avangin MPSC hnuaia exam result tihchhuah tur leh exam hun tura duan lâwk tawhte a khaih­lak nasa niin MPSC hotute'n an sawi.

Tarlan tawh angin, MPSC chairman JC Ramthanga báng tura an phût vangin MZP chuan April 15-16, 2024 khan MPSC pisa kái turte an dang. Mizoram sorkarin MPSC hna lak dan chhui tura M Lalmanzuala April 16-ah a ruat avangin MPSC pisa khàr zui a ni a, April 25 thleng khar niin, April 26-ah pisa an kái leh ṭan a ni.

Exam buatsaih tawh, hun rei tak hnu pawha result tihchhuah loh a awm chungchanga Vanglaini zawhna chhángin MPSC Examination hotute chuan, tun hnaiah hun eng emaw chen pisa an kài theih loh avangin hna tam tak khaihlak a awm thu an sawi a, "April thla chhunga tihfel vek tura kan ruahmante pawh result endiktu turte hnena answer paper kan pek dawnah office min khàrsak ta si a, result buatsaih a khawtlai phah. Endiktute hnenah sem chhuah leh mek a ni," an ti.

MPSC hotute sawi danin, interview tura an ruahman lâwk tawh post pariat chu chawlhkar hnih vel an pisa khàr a nih avangin an ti thei lo a; MPSC chairman JC Ramthanga May 6-ah a chhuah avangin chairman thar a awm hma chuan interview neih theih a nih an ring lo.

Hna hrang hrang lâkna atana advertisement chhuah hun, dilna thehluh hun chhung, diltute endik hun chhung, valid/reject list siam leh tàr chhuah hun, admit card lak chhuah leh exam kaihhnawih thil pawimawh tàr chhuah hun tura an ruahman tawhte chu siamrem vek a ngai.

MPSC hotute chuan, "April 23-25, 2024 chhunga hna pahnih exam tura kan ruahman chu office khàr a nih avangin kan ṭhulh a, a dang kara va zeh luh leh mai a buaithlak tawh a, a tharin exam leh a kaihhnawih thil tih hun atan ruahmanna thar siam leh a ngai dawn," an ti.

An sawi danin, Excise & Narcotics department-a thawktu lak tura practical efficiency test neih turah Rajiv Gandhi Stadium an hauh lâwk a, mahse, office an kal theih loh avangin a hunah an ti thei lo. Tunah mi dangin RG Stadium an lo hauh khat leh vek tawh a, ni thum an mamawh a, hun àwl a awm leh theih hun an nghak mek.

Department hrang hranga post 16-a mi 50 kaisanna tur ngaihtuahtu Departmental Promotion Committee (DPC) pawh ṭhutkhawm hun tura ruahmanah an ṭhu thei lo a; April 16, 2024-a ngaihtuah tura an ruahman, exam tur ruahmanna lutte pawh pisa khàr vangin exam hun tur bithliah theih loh an neih nual bawk.

Hna ṭhenkhat lakna tur Finance-in a pawm tawh, advertisement chhuah mai loh a awm ṭhin chungchangah MPSC hotute chuan, "Finance-in an pawm hnuah department-ah a lêt leh a, department-in MPSC-ah proposal an rawn thawn leh ṭhin. Department proposal-ah syllabus awm lote leh thil dang felfai lo a awm ṭhin avangin siamṭha leh turin kan thawn lêt leh phawt ṭhin," an ti a; Finance-in an pawm avang ngawtin hna lakna an kalpui nghal mai theih loh ṭhin thu an sawi a ni.