Ram páwna hna thawkte harsatna chhuitu thlâk turin Home Minister ngen
BJP, Mizoram thupuangtu Lalremsangi Fanai chuan nimin khan Aizawl Press Club-ah thuthar thehdarhtute a kâwm a; India ram páwna awmpui (housemaid) hna thawkte harsatna chungchang chhuitu case in-charge officer (IO)-te chu vai IPS officer-a thlâk turin Home Minister a ngen.
Lalremsangi Fanai chuan, Dubai-a Mizo nulate harsatna chungchang DGP Anil Shukla a hrilh thu leh DGP pawhin chak zawka hmalak a nih theih nan Aizawl SP leh CID SP-te hnenah thil nihphung chiang taka ziak a, a tuartute hming tarlanga FIR thehlut nghal turin a ràwn niin a sawi.
August 17, 2023-ah tuartu chhungte'n Aizawl SP-ah FIR an theh luh thu sawiin Lalremsangi chuan, "Aizawl SP office-a kan kal chu kan beidawng haw viau. Agency-te license neih a sawi zing hle a; CID SP Pu Bisham Singh hnena FIR kan thehluh erawh a lo ngai serious tak zet a, rang taka enquiry kalpuiin case register a ni," a ti.
Lalremsangi chuan, case IO-te hmaichhanah leh phone hmanga a biak ṭhin thu sawiin, "Housemaid issue-a pawimawh ber agency-te dan loa mihring hmanga an sumdawnna sum leh pai kal kual vel chhui uluk a ngaih thute ka thlen," a ti a; thubuaiah hian case IO-te an tui lo a, an phûr lo tih a lang niin a sawi.
Lalremsangi Fanai sawi danin, case IO hmeichhia pakhat chuan Dubai aṭanga awmpui lo haw koin, document siam dik lohnaa agency-te nen thil sual tih thuhmun reng an nih avangin man theih a nih thu hrilhin a vau a, ṭap chungin an inah a haw a ni.
Lalremsangi chuan, "Chhantu tura beiseite vautu an ni hian case investigation titute thlâk an ngai hle tih a tichiang. Housemaid case kal lai hi a serious a, investigation ti turin Home Minister zahawm tak hian neutral leh fair taka investigation ti tur vai IPS ruat se tih hi ka ngênna leh ka phût a ni," a ti.