Mizoram sorkarin thlai tharte lei turin warehouse 30 vel sak a tum : Guarantor-a ṭan phal lohna dan paih tum a ni

Chief minister Lalduhoma chuan, ZPM kaihhruai sorkarin thlai thar palite an leina turah a dah khawmna tur warehouse tam tham tak an sak dawn thu a sawi a; loan lâkah Mizoram sorkar guarantor-a a ṭan phal lohna dan The Mizoram Ceiling on the Public Guarantee Act chu paih an tum thu a sawi bawk.

CM Lalduhawma hian May 3, 2024-a CMO-a press conference a neihah thlai thar lei an tumnaa an hmalak dante zawhna chhángin, "A hmasa berah chuan warehouse sak a ni phawt a, hmunphiah chìnna hmun parukah warehouse lian deuh deuh kan sa dawn a, a sakna tur sum pawh Finance-in kan pe fel tawh," a ti a, Model Code of Conduct a tawp veleh minister Lalthansanga hoa bawhzui nghal a nih dawn thu a sawi.

Thlai dang lâk khawm nan mipui tana pan awlsam tur laiah collection centre tur warehouse an sak phawt dawn thu sawiin Lalduhoma chuan, "Horticulture leh department dang aṭang hian warehouse dang 20/30 sak belh tur kan nei a, sum kan nei sa diam tawh. Heng hi chu sawhthing leh hmarcha zone ve deuh a ni. Agriculture link road 46 kan lài dawn. Handholding lam thil atana ṭangkai tur kawng ṭha kan mamawh avangin kan tihsak dawn," a ti.

Chief Minister chuan, thlai tharte chu mi pakhatin lei sèn a ni loh avangin a hmun azirin an ṭhen hrang nuai dawn tih sawiin, "A leitu turte dawr mek kan nei a, eng emaw zatin kan ti duh an rawn ti a, min rawn dàwr tawh a, kan hruaitute'n an thliar hrang mek," a ti a, a ṭhen chuan loan laka lian taka tiha sawngbawl nghal theih an duh thu a sawi.

Thlai tharte lei leh sawngbawlna kalpui turin miin loan an lak theih nan guarantor-ah sorkar a ṭan a ngaih thu a sawi rualin CM Duhoma chuan, Congress sorkar laia siam The Mizoram Ceiling on Government Guarantees Act, 2011 avangin an ṭan theih loh thu a sawi a, "Kan entrepreneur-te tana guarantor-a ṭan hi mipui hma leh Pathian hmaa kan intiamna a ni," a ti.

Lalduhoma chuan, dan siamṭhat tumin an bei mek tih sawiin, "June 6-ah khian Cabinet-in a ngaihtuah dawn a, siamṭhat dan tur pawh kan tifel diam tawh. Kan sorkar hian ṭul a tih chuan guarantor-a kan ṭan theihna tur min dâltu dan hi kan paih leh phawt dawn. Session-ah bill put luh a ngai a, session pawh kan nghâk hman kher lo ang a, kan hmanhmawh chuan ordinance-in kan kalpui rih mai ang chu," a ti a; dan paih a nih chuan sorkarin ṭul a tih chuan guarantor-ah sorkar a ṭan theih dawn thu a sawi.

(Phek 2-ah zawm a ni)