Phûllem phahna tur cheng nuai 1,600 Central-in an sanction - Sports Minister

Sports & Youths Services minister Robert Romawia Royte chuan, sorkar laipuiin Mizorama hockey khelmual pahniha phûllem phahna atan cheng nuai 1,600 a rawn pek thu a sawi.

Hockey Mizoram website thar SYS Minister pisaa nimina a tlangzarhnaah thu sawiin Robert Romawia chuan, "Sorkarin ṭhalaite hmakhaw thlir thui tak neiin, kawng hrang hrangin hma a la chho mek. Tunah hian Aizawl district Muallungthuah leh Lungeiah hockey field phullem phah turin central sorkarin sum cheng nuai 1,600 zet a sanction. Hockey hmanga infiamna hi chawi lâra tihvul zel kan tum a ni," a ti.

Hockey India-in kum 2019 aṭangin a hnuaia affiliated unit member-te website nei vek turin ti mah se, Hockey Mizoram chuan sum harsatna avangin a tihlawhtling thei lo a; tun hnai khan website thar -  http//hockeymizoram.org an siam a ni.

Hockey India hnuaiah hian affiliated member chi hrang pali an awm a, permanent member 29, associated member 28, academic member 33 leh hockey member pahnih an awm a; Hockey Mizoram hi permanent member 29 zinga pakhat a ni.