Kalphung thar sorkarah mipui an hlim - Minister PC Vanlalruata
ZPM party chu nimin khan an pisaah an inkhawm a; minister PC Vanlalruata'n thu sawiin, thlai lei tura an intiamte chu an lei ngei dawn thu leh kalphung thar sorkarah mipui an hlim thu a sawi.
PC Vanlalruata chuan, kalphung thar vangin mipui an hlim nia sawiin, "Thla li chhung leka he sorkar chêtna avangin ram mipui an hlim a, an lung a muang a ni. Sorkar hnathawkte pawh mipui tana biak nuam leh an thawh chhan ang ngeia mipui tan ṭhahnemngai lehzuala thawk turin ka duh a ni," a ti.
Agriculture minister PC Vanlalruata chuan, "Sawhthing, hmarcha, aieng leh hmunphiah kan lei dawn kan ti a, kan intiam ang ngeiin kan lei dawn. A bikin sawhthing chìn tum an tam a, a chî ringawt pawh lei tur a váng tawh. Lo chíng u la, kan lei ngei ang tih kut hnathawktute kan chah nawn a ni," a ti a; taima taka thawk zel turin kut hnathawktute a chah.
Society hmangin Mizoram an din thar dawn tih sawiin Vanlalruata chuan, kum tam hlawhchhampui tawh a nih avangin uluk takin ruahmanna siam mek a nih thu a sawi a, "Buh leh bâla intodelhna tura ruahmanna kan siamah kalphung thar mipui sorkar hian eptu bial kan thliar dawn lo a, kan zavai huap a nih dawn avangin taima apiang an hlawhtling dawn a ni," a ti.
PC Vanlalruata chuan, dik thei ang bera kal an tum mek karah nasa taka beih an tâwk tho tih sawiin, "Lalpa malsawm ram rim nam din kan tum a, 'Ka eiru lo ang' tia bul ṭantute kan nih angin dik takin kan kal mek a, contract leh supply-ah percent chan ve kan tum lo," a ti a; dan hnuaiah, dik tak chungin induhsak theihna a awm a nih chuan party mite an induhsak dawn tih sawiin, chu chu kalphung dik lo a nih loh thu a sawi.
Chief Minister-in CM ṭha bik a nihzia a lantir mek nia sawiin PC Vanlalruata chuan, "A intiam ang ngeiin work department a enkawl lo a, Finance erawh a enkawl. Leiba ngah tak chunga bul ṭan kan nihzia hretu kan ni chungin healthcare bill bá chéng vbc. 65 pek a ni a, êng chhit man vbc. 83 chuang pek a ni bawk," a ti.