KHAWTHLIR

Thisen pe

Health Worker Training School chuan International Nurses Day thleng tur pualin nimin khan Civil Hospital, Aizawl Blood Bank-ah thisen unit 65 an pe a, petute mipa 45 leh hmeichhia 20 an ni.

Chetsualnaah thi

May 5, Pathianni khan Lalawmpuia (21) s/o Lalramnuama, Ratu chu a JCB khalh hmangin a chesual a, a hmunah a thi. Thu dawn danin, Lalawmpuia hi a hnathawhna avangin Rawpuichhipah a awm a, Pathianni tlai khan Rawpuichhip thlen hma deuhah leiminin kawng a hnawh a, a thian fai zo, a haw lam chu zan dar 8:30 velah Rawpuichhip tawntirh kawngthlangah a tlan liam a ni. Chetsualna hmunah a thi a, a ruang endik a nih hnuah Ratuah vui turin kalpui a ni.

Hmalak dan thlir

Khawzawl District Narco Coordination Center chuan nimin khan DC conference hall-ah an chairman K Lalrohlua, bawrhsap hoin ruihhlo tirêm tura hma an lâk tawhnate leh hmalak zel dan turte an thlirho. Ṭhutkhawmah hian Khawzawl district-a ruihhlo do zel dan tur an rèl zingah, kohhran tinte hnenah ruihhlo ṭhat lohzia sawi uar tura ngen leh awareness campaign huap zau zawka neihte a tel.

Mizote chhuang

Chief minister Lalduhoma chuan, Indian Super League 2023-24 season-a champion Mumbai City FC-a Mizo player pathum - Lallianzuala Chhangte, Lalengmawia Ralte leh Hmingthanmawia te a chhuan tak zet thu a social media account-ah a tarlang. Home minister K Sapdanga leh Sports minister Lalnghinglova Hmar-te pawhin an chhuan thu leh an lawm­pui thu an tarlang bawk.

VUC-ah thlen

PC party chuan ZPM MLA-te chu uchuak taka inhaivûrah an puh a, an inhaivûr nia an hriat dan leh Assembly Speaker car thar chungchang ZPM Val Upa Council hnenah nimin khan ziakin an thlen tih an tarlang. PC president Vanlalruata chuan, "Simple interest-a kum khata 5.5% leka pung turin MLA 40-in public money aṭangin kuminah cheng nuai 1,050 pûk an tum a, hetiang em em hian MLA term kal tawha MLA-te an la invulh ngai lo," a ti.