FOCUS hnuaia dilna ngaihtuah

Nimin khan Kolasib-ah bawrhsap Dr H Lalthlangliana hoin FOCUS District Level Consultation Meeting (DLCC) neih a ni. Focus Innovation Fund hnuaia dilna 128 lutte chungchang an ngaihtuah a, kum 2021-22 chhunga MGNREGA nen ṭangkawpa hmalak dan tur an rél nghal.

DC Dr H Lalthlangliana chuan, an district-a loneitute leh ngaihtuahna thar sénga dinchhuah tuma bei tak takte dâwmkân an nih theih nan FOCUS in the Northeast innovation fund chu kalpui tur a nih thu a sawi a, "Mi taima tak tak, hlawhtlin ngei tuma hma la ṭhin, sorkara hamṭhatna leh puihna dil nacháng hre lote zawn chhuah hi hna pawimawh hmasa a ni," a ti.

Sorkar aṭanga ṭanpuina beisei tlatte erawh chu ṭanpuina an dawn hnu pawhin dinchhuahpui an tam lo tih sawiin Kolasib DC chuan, "Mipuiah ruahtui khâwl dan chungchanga inzirtirna neih a ṭul," a ti a, tui indaih lohna avanga harsatna tam zawk chu ruahtui khawlna ṭha nen phuhrûk theih a nih thu a sawi.

Meeting-ah hian FOCUS Innovation Fund hnuaia Kolasib district-a hmalak tum mi 128 aṭanga dilna lutte sawiho a ni a, kum 2021-22 chhunga FOCUS leh MGNREGA thawhhona kalpui dan turte rêl a ni bawk. Diltute chu Expert Committee kaltlanga zir chianna neih hnuah a ṭul anga thlitfim leh ni se, an ti.

Innovation Fund hnuaia dilna lut tam ber chu vawk vulh a ni a, kuhva huan siam tum leh ar vulha hmalak tumin an dawt a ni.