Ram neitute'n hna thawktute tiam chin awm loin an chawlhtir

National Highway-302 kawngpui laih meka ram lak tawh neitu ṭhenkhatin zangnadawmna an la lâk loh avangin nimin aṭang khan Lungsen huam chhunga hna thawktute tiam chin awm loin an chawlhtir.

Lungsen Area Land Owner Association for NH-302 chairman Thangrema sawi danin, NHIDCL-in Lungsen huam chhung a paltlang dawn avangin kum 2020 khan zangnadawmna thawh khatna sem ṭan a ni a, kum 2021-ah sem zoin, kum 2022-ah additional sem leh tura ruahman a ni.

Lungsen huam chhunga zangnadawmna la dawng lo mi 35-te chu additional-a sem tur zinga telh a ni a, hun rei tak chhung an nghâk tawh. Zangnadawmna la dawng lote chu Lungsen VC-1, Lungsen VC-2 leh Rangte VC huam chhunga mite an ni.

Thangrema chuan, inbiakremna angin an ram pawh laih a ni nual tawh tih sawiin, "Inbiakremna anga zangnadawmna pek kan ni ve lo hi hriatthiam harsa kan ti. NHIDCL nawrna atan hna an thawh chhunzawm tawh loh kan duh," a ti.

Zangnadawmna hmu si loa kawng sial a zawh hman chuan zangnadawmna an hmuh tur ang hmuh loh an hlau tih sawiin Thangrema, "Chhungkaw harsa ve tak tak kan ni," a ti a; kawng ṭha an duh vangin pawisa hmu hmasa loin an ram chhungah kawng an sialtir thu a sawi.

Thangrema chuan, April 15, 2024 khan chanchin lawmawm an hriat loh chuan a ṭul anga hmalak an tum tawh tih sawiin, "CALA leh NHIDCL lamte'n lo ngaichâng lawk tura min tih angin kan ngaichâng a, tun thlenga thu lawmawm kan la hriat loh avangin hna thawktute chawlhtir phawt kan rél a ni," a ti.