NLM hotuin vawk vulhna a enfiah

Sorkar laipuia National Livestock Mission (NLM) deputy commissioner Dr Lipi Sariwal chuan May 2-4, 2024 chhung khan NLM hnuaia Mizorama vawk vulh ṭanpuina pek hmanga hmalaknate a a rawn enfiah.

Dr Lipi Sariwal hian NLM hnuaia Lengpui leh Dihmunzawla vawk vulhnate a tlawh a, ṭanpuina dawngtute hmalakna chu ṭha a tih thu sawiin, "NLM-in a tum ber chu ran chi ṭha chhawm nun leh tihdarh zel a ni," a ti a; farm a tlawhte'n ṭha taka hma an lak bakah, loan leh subsidy-te dik taka an hman avanga a lawm thu sawiin, farm neitute'n an farm an tihchangtlun zel dan tur a sawipui nghal.

Mizoram AH&Vety department hotute nen an inkawmnaah Lipi Sariwal chuan, a tam thei ang berin NLM hnuaia hamṭhatna an dawn theih ngei a duh thu sawiin, darh zau zawka NLM chungchanga hma la turin thawktute a chah a; vawk vulhtute tan inzirna buatsaih tam tur leh ṭha zawka farm an enkawl dan kawhhmuh turin a chah bawk.

Vawk vulhtute'n an harsatna lian ber - Mizorama ran chaw man sang lutuk chungchangah Dr Lipi Sariwal chuan, ran chaw man sang tihhniam dan tur sorkar laipuia hotute a sawipui tur thu a sawi.

AH&Vety department hotute sawi danin, NLM hnuaiah hian vawk vulh (piggery), ar vulh (poultry) leh kel vulh (goatary)-ahte ṭanpuina loan leh subsidy pek chhuah a ni a; tun dinhmunah ṭanpuina diltu mi 174 awm tawhin, mi 30 hnenah subsidy first instalment pek tawh a ni.

NLM hnuaia ṭanpuina pek theih chungchang hre chiang duh tan AH&Vety Directorate-ah zawhfiah theih a nih thu an tarlang bawk.