Ruihhlo donaa hmalak dan thlir

Khawzawl District Narco Coordination Center chuan nimin khan DC conference hall-ah an chairman K Lalrohlua, bawrhsap hoin ruihhlo tirêm tura hma an lâk tawhnate leh hmalak zel dan turte an thlirho.

K Lalrohlua chuan, Khawzawl district chu ruihhlo tawlh rûkna kalkawng a nih avangin an district-ah ruih theih thil a hluar phah nia a hriat thu a sawi a; "Ruihhlo la ti ve lote venhim hi ngaih pawimawh hmasakah neih a ngai. Sorkar, khawtlang, kohhran leh tlawmngai pawlte'n kan thlen chin ṭheuhah ruihhlo tih chhin loh pawimawhzia uar taka kan zirtir zel a ṭul," a ti.

Ṭhutkhawmah hian Khawzawl district-a ruihhlo do zel dan tur an rèl zingah, kohhran tinte hnenah ruihhlo ṭhat lohzia sawi uar tura ngen leh awareness campaign huap zau zawka neihte a tel.