World AIDS Orphans Day hmang

Gan Sabra, François-Xavier Bag-noud Foundation (FXB), Positive Women Network of Mizoram (PWNM) leh Blue Heaven Academy-te ṭangho buatsaihin, Inrinni khan Aizawla IPR Auditorium-ah World AIDS Orphans Day hman a ni a; Health minister Lal Thanzara'n a hmanpui.

Health Minister chuan, "Fahrah nih hrim hrim hi a rapthlakin, AIDS vanga nu leh pa nei lo naupangte an khawngaihthlak lehzual. Nu leh pa nei lo natna vei zui naupangte an vanduaiin an khawngaihthlak tak zet a ni. India ramah HIV/AIDS vei tam ber dawttu nihna kan chelh hi a chhuanawm loh hle," a ti.

Lal Thanzara chuan, "HIV/AIDS hi sorkar leh MSACS chauhin an do hneh chi a ni lo a, ṭanrual a ngai," tiin, kohhran leh tlawmngai pawlte’n rálpui phiara an phiar loh chuan tun aṭanga kum ngaah chuan Mizoramah AIDS a darh nasat tur thu a sawi a; MLA-te inpekna avangin HIV/AIDS veite’n an dinhmun an hriat chian nan cheng nuai 18.5 man CD4 Count Machine an chah thlen thu a sawi bawk.

World AIDS Orphans Day hi kum 2002 aṭang khan hman ṭan a ni a, Mizoramah pawh kum 2004
aṭang khan kum tin May 7-ah hman thin a ni.

Kumina World AIDS Orphans Day thupui chu ‘Raise your voice’ tih a ni a; Health Minister chuan HIV hrik pai naupangte chu beiseina nung nei chunga hma la zel turin duhsakna a hlan a ni.

Inkhawmah hian Lalruatfeli Pachuau (PWNM), Christina Lalrindiki (FXB), C Laldingliani (Gan Sabra) leh Rebecca Saimawii (Ambassador for Children Living with HIV) te pawhin thu an sawi.