P&E-in êng pe thei dawn lo

P&E department chuan thuchhuah siamin, 132 kV Zuangtui-Bukpui line siam ṭhat hna thawh mek a ni tih a tarlang a, "Porcelain insulator-te chu polymer insulator-a thlak mêk a ni. Hna chhun-zawm nan phase thumin shutdown lak a ni dawn a, shutdown lak chhung hian 132 kV Zuangtui-Bukpui line-in a châwm khua zawng zawngah power supply pek theih a ni dawn lo," an ti.

P&E department tarlan danin, shutdown hun tur chu May 9-14 chhungin zing dar 9 aṭanga tlai dar 4 inkarah a ni dawn a; hemi chhung hian 132 kV Zuangtui-Bukpui line-in a châwm khuate chu Khawzawl-East Lungdar line aṭangin power supply pek tum a ni a, mahse mipui mamawh a phuhru zo dawn lo a ni. Eng pek mumal theih a nih dawn loh avang hian P&E department chuan mipuite hriatthiamna an ngen.