Electric meter box thar vuah mek

Joint Electricity Regulatory Commission (JERC) for Mizoram and Manipur phût angin, kumin chhungin Mizoram pumah electric meter box thar vuah tum a ni a; meter box thar Maximum Demand Indicator (MDI)-te chu May thla tìr aṭang khan vuah ṭan a ni.

Power & Electricity depart-ment hotute sawi danin, MDI hi P&E department-in an supply tur leh mipuiin dâwra an lei theih tura kalpui tum a ni a; a zuar tura thlan an awm lo a, a duh duhin an zuar thei.

P&E chuan MDI thar 10,000 chuang an chah thleng tawh a, connection ti thar leh meter box ṭha lo an thlak hmasa mek.

JERC ruahmanna ang chuan, meter box thar chu April 2016 bill chhuak aṭanga hman ṭan tum a ni a, bill thar angin a kal tawh ang. MDI hi P&E chuan Rs. 1,200-in an pe chhuak a, department-a thawktute chauhin an thlak thei a, mipuiin dawra mi an lo lei a nih pawhin mahni thua thlak loin, P&E mite thlaktir tur a ni.

Metre box thar hi consumer-in dawra mi a lei chuan thla tin meter rent a chawi tel a ngai dawn lo a; P&E department ta an hman erawh chuan, meter security an pe ang a, MDI hawh man (meter rent) an chawi a ngai thung.

P&E department hotute chuan, MDI hman a nih chuan electric bill en dan a awlsam phah tawh dawn tih an sawi.

Chhungkaw pakhat tan meter box pakhat pakhat zel vuah tur a ni a; MDI chu P&E department-in an supply a nih chuan a leina man (purchase rate) bakah 15% an lak tel dawn avangin mipuite'n anmahnia an neih (dawra mi an lei) a ṭha bera an ngaih thu an sawi.