Journalist-te tan mental heath training

Light for Comprehensive Development (LiFCoDe) chuan, Inrinni khan Aizawl Press Club-ah MJA member-te tan mental health training an buatsaih.

Training hi LiFCoDe general secretary John Lalnunsanga'n a kaihruai a; Mizoram Mental Health Programme-a SNO Dr Robert Khawl-hring leh MJA vice presi-dent Zonunsanga Khiangte ten thu an sawi zawhah resource person Lalremruati, Aizawl West College Psychology department-a zirtirtu kaihhruainain mental health atana pawimawh hrang hrangte zirho a ni.

Lalremruati chuan, journalist-te chu mipuite ngaihdan siamtir theitu an nih avangin news an ziah danah fimkhur a ngai tih a sawi a, "Thil ṭha lo a thlen chuan ziah loh tur a ni hauh lo a, mahse, thil ṭha lam ziah tel hram hram a pawimawh. Mi hlawhtling leh mi thil tih ṭhat ziahte hian mipuiin beiseina an neih phah thei. Positive news hian society-ah hmasawnna a thlen thei a ni," a ti.

Lalremruati chuan, ril-ru hriselna nei turin ngaih-tuahna dik put hram a ngai tih sawiin, "A ṭha zawnga thil ngaihtuah hian hlimna min pe a, hlima chuan ṭha taka hnathawk turin min pui ṭhin. Chu chuan hlawhtlinna a thlen thei a ni," a ti a; rilru hriselna nei turin mahni inenkawl uluk pawh a pawimawh thu a sawi.

Training zawhah MJA member-te hriselna din-hmun endik nghal a ni a, an mamawh ang damdawi a thlawnin an sem.

LiFCoDe hian rilru lama harsatna neite an pui ṭhin a; Whatsapp, SMS leh phone call hmangin mobile phone number 7085066678-ah biakpawh theih reng an ni. Rilru lama harsatna neite chuan anmahniin a theih ang anga an puih bakah, an harsatna a zirin pan turte an kawhhmuh ṭhin.