KHAWTHLIR

Thisen pe

Zemabawk Branch KṬP chuan an branch diamond jubilee pualin Innrinni khan Synod Hospital tan thisen unit 47 an pe a, a petute mipa 45 leh hmeichhia pahnih an ni. Inrinni vek khan Lungsen Venglai Branch YMA chuan Lunglei Civil Hospital tan unit 25 an pe a, a petute mipa 18 leh hmeichhia pasarih an ni. Mualpui Bial PYD member mipa 14 leh hmeichhia parukte pawhin Aizawl Civil Hospital tan unit 20 an pe bawk.

AK-47 man

Mizoram Police-a CID (Crime) Special Narcotics PS mite leh 39 Assam Rifles ṭangkawp chuan, May 6, 2016 zanlai vel khan Lalrintluanga s/o Liantawna, Luangmual, Aizawl inah AK-47 rifle pahnih, a magazine pahnih leh a mu 500 an man. Vaivakawn Police Station hotute sawi danin, Lalrintluanga ina silai an man hi a thar vek a ni a, cheng nuai 12 man vela chhût a ni. Silai kawltu Lalrintluanga pawh man nghal a, nimin khan Court-ah hruai niin, police-in an kawl rih dawna thu dawn a ni.

Luiah tla hlum

K Lalrinsanga h/o Lalhmingi, Khawruhlian Venglai chu May 7, 2016 chawhma dar 11 vel khan Tuirial Dapzar luiah a tla hlum a; chawhnu dar 1 velah a ruang hmuh a ni.

Doctor kaisang

Aizawl Civil Hospital-a dy. medical superintendent Dr. KL Remsanga chu tun hnai khan medical superintendent-ah a kaisang a, ENT-a head of department Dr. HC Laldina chuan dy. medical superintend-ah a kaisang thung.

Weighbridge tha

Serchhipa FCSCA kudama lirthei leh a thil phurhte bùkna, weighbridge chhia, kum khat chuang hman loha awm tawh chu tun hnai khan siam ṭhat a ni a, Inrinni aṭang khan hman leh ṭan a ni. Weighbridge chhia hi LH Thanga Enterprise-in Bangalore-a Statweight India Pvt. Ltd. ruaiin a siam ṭha a, siam ṭhat a nih hnuah Legal Metrology-in khawl hmangin a endik a ni.