May 24-25 ah SMATE buatsaih dawn

9th May, 2016

Higher & Technical Education (HTE) department chuan, an ruahman lâwk angin May 24-25, 2016 chhung khian State Medical and Technical Exam-i-nation (SMATE) an buatsaih dawn.

HTE Technical Wing hotute sawi danin, Mizoram sorkarin Biology subject lamah seat 222 a nei a, chu'ng zinga 47 chu MBBS leh BDS zir turte chanpual a ni a; seat 175 chu BVSc, B.Pharm, B.Sc (Agri), B.Sc (Nursing) leh subject dangte insem tur a ni.

Tarlan tawh angin, Supreme Court chuan thupek tichhuakin, MBBS leh BDS zir turte'n National Eligibility Entrance Test (NEET) an paltlang ngei a ngai tih a puang a; hei vang hian Mizo zirlai, Mizoram quota-a MBBS leh BDS zir duhte pawhin NEET an paltlang a ngai tawh dawn a ni.

HTE Technical Wing hotute chuan, MBBS leh BDS zir turte'n NEET an paltlang ngai tawh mah se, technical seat dang zir turte thlan nan SMATE buatsaih tho a ngai tih an sawi a; "Court thutlukna chu eng pawh ni se, Mizoramin quota a neih ang angte Mizo naupangte'n an hnawh khah ngei theih hi kan duh ber a ni," a ti.