SWD Minister-in Girls Hostel a hawng

Ministry of Tribal Affairs aṭanga sum hmuh hmanga Mamit College-a sak Schedule Tribe Girls Hostel chu nimin khan Social Welfare (SWD) minister Dr K Beichhua'n a hawng.

Dr K Beichhua chuan, Mamit district chu Aspirational District a nihna aṭanga khaichhuah a nih theih nan theihtawp chhuah zel turin district mipui a chah a, "Sorkar pawhin Mamit district tan theihtawp a chhuah mek. Mizoram sorkarin hri léng avangin hmalakna duh angin kalpui thei lo mah se, mipui hmasawnna turin theihtawp a chhuah zel a ni," a ti.

Mizoram sorkar leh sorkar laipui inkara leilâwn pakhat chu Social Welfare department a nih thu sawiin SWD Minister chuan, "Tuna hostel hawn tâk pawh Ministry of Tribal Affairs aṭanga hmuh a ni. Zirna hi hnam changkang kan el ve phâkna kawng awm chhun a ni," a ti a, Mamit College-a zirlaite chu theihtawp chhuaha zir turin a chah.

Bialtu MLA H Lalzirliana pawhin thu sawiin, hostel hawn theih a ni ta chu lawmawm a tih thu a sawi a, "Kan district hi Aspirational District kan nihna aṭanga kan chhuah theih nan responsible citizen nih a ṭul. Kan ngaihtuahna tisang a, kan thiamnate kan district leh ram tana hman ṭangkai a pawimawh," a ti.

ST Girls Hostel hi cheng nuai 186.93 sénga sak a ni a, chhâwng hnih niin, ground floor chu sq.metre 161 leh first floor chu sq.metre 205-a zau a ni. Khum 24 awm theihna pindan paruk a awm.