Hmalak dan tur ngaihtuah a ni

Lawngtlai District Water & Sanitation Mission (DWSM) chu nimin khan an chairman Dr Andrew H Vanlaldika, district bawrhsap hoin DC conference hall-ah an ṭhukhawm a, hmalak dan tur an ngaihtuah.

Dr Andrew H Vanlaldika chuan, DWSM chu an district-a thingtlang khuate'n tui thianghlim hnianghnar tak an hmuh theihna tur leh fai leh thianghlim taka an awm reng theihna tura hmalakna a nih thu a sawi a; member-te chu ngunthluk taka ngaihtuahna séng turin a chah.

PHE Lawngtlai WATSAN Division-a executive engineer Netralal Jaisi chuan, Jal Jeevan Mission (JJM) leh Swachh Bharat Mission-Grameen (SBM-G) hnuaia hna thawh kal mek report a pe a; PHE Lawngtlai WATSAN Division-a SDO T Mangliandinga chuan kum 2020-21 chhunga hna thawh tur ruahmante a sawifiah.

Meeting-ah JJM, SBM(G) leh convergence hnuaia hna kal mek leh hmachhawpte sawiho a ni a, hmasawnna ngêlnghet leh tlo a awm theih nan department hrang hrang inhriat pawh tawn a, inthawhpui tawn (convergence) a pawimawh thu tarlan a ni.

Meeting-a tarlan a nih danin, Jal Jeevan Mission (JJM) hnuaiah kum 2024 hma ngeiin thingtlang in tinah tui connection (functional household tap connection) pek kim turah kum 2019-20 chhungin Lawngtlai WATSAN Division hnuaia khaw 35-a in (household) 4786 tinzawn niin, September 2020 thlenga FHTC pek fel tawh zat chu in 3467 a ni. 

Kum 2020-21 atana khaw 13-a in 1321 hnena FHTC pe tura ruahman pawh hna thawh ṭan mek a ni. Hei bakah hian Lawngtlai district chhung ni si, PHE Siaha WATSAN Division hnuaia awm, Sangau RD Block hnuaia khaw 4-ah te kum 2020-21 chhung atana FHTC 1633 pek hna chu Siaha Division-in an thawk ve dawn bawk a ni.