MNF-in sorkarna a siam a ngai - Zoramthanga

MNF president Zoramthanga chuan, kum 2018 Assembly inthlanah Congress party leh MNF chu a inel ber tur an nih leh thu sawiin, Zoram malsawmna thuthlung hâi lut turin MNF-in sorkarna an siam ngei a ngai niin a sawi.

Nimina Mizo Hnam Runa inkhawmah thu sawiin Zoramthanga chuan, “Congress party dinhmun en hian a lungchhiatthlak. Ram pum inthlanah India mipuite’n thal ṭhruai khawpin an paih a, state inthlan apiangah pathumna an hauh pha emaw a ni chauh tawh. An headquarters Delhi aṭangin an mawih siai siai a ni. Zoram malsawmna thuthlung hailut turin MNF-in sorkarna a siam ngei a ngai ,” a ti.

Zoramthanga chuan, MNF chu Aizawl Municipal Corporation (AMC) inthlanah Congress leh MPC ṭang dunin an hneh lo tih a sawi a; kum 2018-ah Congress thlang nawn duh tur khawpin Mizo mipuite an â lo niin a sawi bawk.

MNF President chuan, MNF-in economic policy leh hmathlir fel tak an nei sa nia sawiin, Chaw-a intodelhna tur leh rua leh rubber-te pawh a chhinna tur bik 'compact area’ neiin lei chung hausakna kan hai chhuak dawn. Kan tih tur leh hmalakna tur bakah, kan sorkar laia hmachhawp awmte chhunzawm turin a chhiarkawp nen kan chhut vek tawh. Delhi buhzêm tel loin, Zoram buhzêm hmanga intodelh kan tum,” a ti.

MNF thuchhuah tarlan danin, Mizo Hnam Runainkhawmah hian ZNP hruaitu ṭhenkhatte leh Congress party mi ṭhenkhatte MNF president Zoramthanga'n a lawm lut.

Nimin vêk khan Lungleia Mizo Hnam Runah pawh MNF senior vice president Tawnluia'n Lungleia ZNP vice president R Lalramzauva leh secretary eng emaw zat MNF-ah a lawm lut a ni.