Rangkachak rûkbo thubuai. Police-in AR Commandant an kawl rih dawn Muanawma leh Bulaki Baid jail-ah dah an ni

Rangkachak tawlhrûk rûkbo thubuaia man 39 Assam Rifles commandant Col. Jasjit Singh chu police-in darkar 48 chhung an kawl belh Court-in a phalsak. Hetih lai hian, police-in an man dang, Lalmuanawma Mathipi leh Bulaki Chand Baid te chu jail-a dah turin a ti thung.

Police-te'n Col. Jasjit Singh ni nga chhung kawl chhunzawm (remand) an dilna chu nimin khan chief judicial magistrate (CJM) Vanlalchami'n a ngaihtuah a; Col. Jasjit Singh leh sorkar ukilte thusawi a ngaihthlak hnuah police-te dilna a phalsak. Col. Jasjit Singh hi Bawngkawn Police Station-ah dah a ni.

Col. Jasjit Singh-a ukilte chuan, police-in an koh hun apianga an kal tur thu sawiin, "Kan kal lo a nih chuan min man ru. Ni thum an kawl hnuah pawh engmah hriat chhuah an nei lo a, kawl leh mahse engmah an hmu chuang lo ang," an ti a; police-te'n warrant of arrest an neih chu a mumal lo niin an sawi.

AR Commandant ukilte chuan, interim-a remand pek a niha dan tlawhchhan chu a dik tâwk lo niin an sawi a, "Court hian a dik tawk lo chuan thutlukna siam tawh lo se, Court zahawmna atan kan duh," an ti.

CJM chuan, a thutlukna siam danah dik tâwk lo awma an hriat chuan Court sang zawkah zualko mai turin a hriattir. Jasjit Singh-a ukilte chuan, Court sang zawka zualko lam an rilrûk loh thu leh dan dik tâwk loa thutlukna siam tawh lo a, tuna remand an dilna pawh chu hnâwl ni se an duh ber thu an sawi thung.

Sorkar ukil H Lalmuankima chuan, police-in an man hmasak AR mi leh saten rangkachak rûkbo thubuaiah hian Col. Jasjit Singh a inrawlh tih an sawi chian thu a sawi a, "Thu zawhfiah mek a ni a, a thusawiah inmil lote a awm. Judicial custody-a a awm loh chuan kan thil chhui mek hi awmzia a awm dawn lo," a ti.

Rangkachak bo hmuh chhuah leh ngei an duh avangin hmuh lêt a nih theih nan Jasjit Singh chu police-te kawl phalsak turin Court-a ngen a ni.

Ukil pahnihte thusawi a ngaih-thlak hnu leh dan hrang hrang a en hnuah Chief Judicial Magistrate chuan, Col. Jasjit Singh chu police-te'n darkar 48 chhung an kawl leh a phalsak ta a ni.

CJM chuan, rangkachak rûkbo thubuai veka an man, jail-a táng tawh Lalmuanawma Mathipi leh Bulkai Chand Baid-te jail aṭanga la chhuaka police-in an kawl mek chu kawl zui a phalsak tawh lo a, jail-a dah leh turin a ti thung.

Lammuanawma leh Bulaki Chand ukilte sawi danin, dan chuan ni 15 aia rei police-in an mi mante an kawl thiang lo. An client-te hi police-te'n darkar 72 kawl phalna May 5, 2016-ah an dil a, Court-in a phalsak a ni. Mahse, police-te chuan May 5-ah la chhuak loin, May 8 khan jail aṭangin an la chhuak chauh a, hei vang hian an man aṭangin ni 15 a zo tawh a ni.

Hemi chungchangah hian sorkar ukilte chuan, police-te thil tih dan chu an hriatpui loh thu an sawi.