KHAWTHLIR

Thisen pe

Hortoki Bial KṬP chuan nimin khan Hortoki khuaah blood donation camp an huaihawt a; mipa 32 leh hmeichhia pahnihte'n Synod Hospital tan thisen unit 35 an pe.

Ruang chhar

Nimin chawhma dar 11 vel khan Ngaizelah mipa ruang chhar a ni a, a hnuah Lalramhluna (37), Tlangnuam Block Veng a ni tih hriat a ni.

Minister ngen

Mizoram Chemist & Druggist Association hruaitute chuan nimin khan Health minister Lal Thanzara a pisaah an hmu a; pharmacist indaih lohna leh licence chungchanga harsatna an tawhte sutkianpui turin an ngen.

Lak luh khap

Mamit DC chuan thu-chhuah siamin, Bangladesh-ah Bird Flu, PRRS leh Foot and Mouth Disease a leng leh mek nia hriat a nih avangin, Bangladesh leh Tripura aṭangin ar, artui, sava, varak, varak tui, vawk, bawng leh chu'ng aṭanga thil siam reng reng Mamit district chhunga lak luh a khap.

Puantah zirna

Zobawk Handloom Cluster hnuaia mite tan nimin aṭang khan Zobawk Venglaiah puantah zirna buatsaih a ni a, parliamentary secretary (Industries) Joseph Lalhimpuia'n a hawng. Joseph Lalhimpuia chuan, puantah chu eizawnna tling a nih avangin a zirturte pawhin ṭha takin zir chhuah tum se a duh thu a sawi.

Missionary training

DIET, Kolasib buatsaihin nimin khan DIET training hall-ah Barak Area Presbyterian Church & Mission hnuaia Cachar tlangdung khaw paruka missionary zirtirtute pualin ni nga awh tur 'Training of Missionary Teachers' buatsaih a ni. Missionary zirtirtute hi Baruatila, Zaite, Winchester, Telkatta, Noxatilla leh Dolchhora-a Mizoram Synod hnuaia mi 42 an ni.