Mizoramah kum hnih chhungin beng lama Harsatna nei mi 13,450 hmuh chhuah a ni

Health department hnuaia National Programme for Prevention & Control of Deffness (NPPCD) chuan, kum 2014-15 leh 2015-16 chung khan mi 24,795 beng an endik a, chu'ng zinga mi 13,450-te chu beng ṭha lo leh nâ nei an ni tih an hmu chhuak.

NPPCD-a state nodal officer Dr Eric Zomawia'n Vanglaini a hrilh danin, NPPCD hian kum 2014-15 chhung khan hmun hrang hrangah kal chhuaka mipuite beng dinhmun an enfiahnaah mi 11,894 an endik a, chu'ng zinga mi 6,954 chu beng natna chi hrang hrang nei an tih an hmu chhuak a ni.

Beng natna nei hmuh chhuah mi 6,954-te chu ri hriatna lama a ṭha lo zual chi li-ah ṭhen an ni a; ri hriatna chhe zual (profound) mi 24, beng chhêt nasa (severe) mi 71, beng chhêt nasa vak lo (moderate) mi 81 leh beng ṭha si lo, chhêt nasa lo ber (mild) mi 238 an awm.

Beng natna an hmuh chhuahte chu mi 414 an ni a, chu chu beng ṭha lo an hriat chhuah mi 6,954 aṭanga chhûtin 5.95% niin, endik zawng zawng aṭanga chhûtin 3.48% an ni. Mi an endik zawng zawng 11,894 aṭanga chhûtin beng natna nei mi 6,954 chu 58.46% an ni thung.

Kum 2015-16 chhungin mi 12,901 endikin, kum hmasa aiin mi 1,007-in an tam a; beng natna nei mi 6,296 (48.80%) an hmu chhuak. Beng natna nei hmuhchhuah zingah ri hriatna chhe zual (profound) mi 82, beng chhêt nasa (severe) mi 205, beng chhêt nasa vak lo (moderate) mi 330 leh beng ṭha si lo, chhe nasa lo ber (mild) mi 546 an ni.

Dr Eric Zomawia chuan, beng ṭha lote'n beng dâr an vuah ṭhin chu thil zahthlak a nih loh thu sawiin, "Mit chhia chuan tarmit an vuah a, an nalhpui mai a. Beng ṭha loin beng dár an vuahin kan innuihzat fo hi a dik lo. Beng dár vuah hi a zahthlak lo a, mi ṭhenkhatin kan endawng tlat hi kan insiam ṭhat a ngai," a ti.

Bengngawngte'n tun thlengin hmusit leh hnuaichhiah an la tawk nia sawiin, Eric Zomawia chuan, "Mipuiin engtin mah ti lo mah ila, mi zingah an inkiltawih sa hrim hrim a ni," an ti a; putling zingah, thawhpuite leh hotute thusawi an hriat ṭhat theih loh vanga mi luhlul leh ngéng anga an lan ṭhin thu te, thatchhia nih an hlawh phah ṭhin thu leh nuihzat tâwk an awm avangin hrehawm an tih ṭhin thute a sawi.

NPPCD-a thawkte chuan, nau piang hlimte chu an pian aṭanga thla hnih chhungin an beng ṭhat leh ṭhat loh enfiah tur a nih thu te, music ring taka ngaihthlak te, aurinna bengchheng lutuk leh hâlpuah hâlna bula awm lohte a ṭhat thu an sawi a; naupang bengah leh bek velah ben loh tur a nih thu te, hmanraw hriam hmanga beng hawlh loh tur a nih thu te, beng aṭanga tui chhuak leh harsatna a awm chuan a rang thei anga doctor râwn tur a nih thute an sawi bawk.

NPCCD hi Health department-a district pali - Aizawl East, Aizawl West, Lunglei leh Champhai district-ahte an awm tawh a; chu'ng hmunahte chuan doctorm audiologist, audiometric assistant leh instructor for hearing impaired pakhat ṭheuh an awm.

Kum upate tan a bika beng enkawlna Aizawl leh Lunglei district-ahte kalpui a ni a; doctor pahnih ve ve, nurse paruk ve ve leh physiotherapist pakhat ve ve an awm a ni.