CYLA-in Lawngtlai College sak mek an enfiah

Central Young Lai Association (CYLA) hruai-tute chuan, nimin khan YLA General Conference thurel bawhzuiin Lawngtlai College building sak mek a hmunah an endik a; Lawngtlai College principle T Thangṭhuama leh thawktu dangte nen an din hmun mek leh harsatnate an sawiho.

CYLA hruaitute sawi danin, Lawngtlai College building sak mek hi DoNER aṭangin cheng nuai 136 hmuh hmanga sak a ni a; kum 2011-ah work order tihchhuah niin, kum 2014-ah sak ṭan a ni. Tun thlengin first instalment cheng nuai 48 hmuh a ni tawh a, state matching share aṭangin Rs. 5,00,000 hmuh a ni tawh bawk.

Lawngtlai College Principal chuan, an college building tur chu a tir-ah chuan chhâwng thuma sak tura ruahman a nih laiin, India pawisa hlutna a tlakhniam avangin chhâwng hniha sak tura tih a nih thu te, contractor ber a hriat loh thu te, hna thawktu ber chu contractor dik tak a nih loh thu te, hna viltu PWD lam mite'n an vil ṭhat loh thute CYLA hruaitute a lo hrilh a ni.

CYLA hruaitute chuan, Lawngtlai College building sak mek zawh thuai a nih loh chuan zirlaite'n harsatna tam tak an tawh theih thu te, fûrah phei chuan class an kal theih loh a hlauhawm thu te, Girls Hostel tur atana ruahman, class kalna atana hman a ngai chu pawi an tih thute an sawi.

CYLA hruaitute tarlan danin, Lawngtlai College building luah mekah class room tukverh leh kawngkhar pakhat mah a awm lo a, room ṭhenkhat chu cement plaster a ni lo bawk. Lawngtlai College-ah hian zirlai 420 chuang an awm mek.