Enquiry Committee din phût

ZNP chuan thu-chhuah siamin, Lawngtlai District Hospital-a May 1, 2016-a nausen piang hlim thi leh a nu Lalhmunliani nau chunga a thih chungchang chu thu dik hriat a nih theih nan Enquiry Committee dina chhui chiang turin Mizoram sorkar an phût.

ZNP chuan, "May 1-ah Lawngtlai Hospital-a thil thleng, Lalhmunliani (21) vanduaithlak taka raicheha a boral hi pawi kan ti hle a. Hemi kaihhnawiha a pasal Lallianmawia thusawi leh damdawi-ina thawktute thusawi, social media hrang hranga a lan danin mipui tan thudik hriat a har hle. Chhui chiang turin Mizoram sorkar hian Enquiry Committee din vat turin thurâwn kan pe a ni," an ti.

Lalhmunliani leh a nau hrin thih chung-changah hian a pasal Lallianmawia'n a hunah Lawngtlai District Hospital-a doctor leh nurse-te enkawlna an dawng lo nia a sawi laiin, damdawi-ina thawkte erawh chuan an buaipui ngei niin an sawi thung. He thil thleng chungchang hi Lai Students Association pawhin an chhui chiang mek nia thu dawn a ni.