Jail pangaah bituk aia tam an táng; Bituk aia tlem tànna jail panga a awm

Mizorama jail pangaah táng awm thei tur zat bituk aia tam an táng mek a, jail panga dangah bituk zat aia tlem an táng thung.

Mizoramah jail 10 a awm a, chu'ngah chuan táng awm thei tur zata bituk (capacity) belhkhawm chu mi 1,386 a ni. Nimin khan jail táng 1,927 an awm a, bituk aiin mi 541-in an tam zawk.

Jail táng zinga 1,638 chu mipa an ni a, mi 264 chu hmeichhia an ni. Jail-ah hian naupang 25 an awm a, an nute an tàn avang leh enkawltu tur an awm loh vanga an nute bula awmtir an ni.

Aizawla Central Jail leh Central Woment Jail, Aizawl District Jail, Lunglei District Jail leh Champhai District Jail-ahte táng awm thei zat tura bituk aia tam an táng mek.

Siaha District Jail, Kolasib District Jail, Lawngtlai District Jail, Serchhip District Jail leh Mamit District Jail-ahte táng awm thei zat bituk aia tlem an táng mek thung.

Mizorama jail 10-a táng mek mi 1,927 zingah thubuai la chinfel loh (ngaihtuah mek) mi 1,234 an awm a, mipa 1,018 leh hmeichhia 214 an ni. Thiam loh chantir (convict) tawh mi 368 an awm a, mipa 327 leh hmeichhia 41 an ni. Jail 10-a táng mek zinga mipa 57 chu dam chhunga táng tura an chungthu rèl tawh an ni bawk.