World AIDS Orphans Day hmang

Nimin May 7 kha World AIDS Orphans Day a ni a, HIV/AIDS vanga fahrah naupangte enkawlna Gan Sabra chuan an hmun, Luang­mual West-ah an hmang a, Central YMA assis­tant secretary Fabian Lalfak­awma'n a hmanpui.

HIV/AIDS vanga naupang fahrahte ní hmannaah hian Mizoram State Child Protection hotu te, HIV/AIDS veite enkawlna lama hma latu tlawmngai pawl hrang hrang aiawhte leh Mizoram University Psychology department zirlaite an tel a; zaithiam lârte nen hun an hmang a ni.

Fabian Lalfakawma chuan, HIV/AIDS vei naupangte enkawlna, Gan Sabra-a thawktute inpekna leh hnathawh chu chhuanawm a tih thu a sawi a, an kal zelna turah duhsakna a hlan.

Gan Sabra chief func­tionary Lucy Remruati Chhangte sawi danin, Gan Sabra hi kum 2006-ah din a ni a, HIV/AIDS vanga naupang fahrah leh harsatna tâwkte enkawlna hmun a ni. Home-ah hian HIV/AIDS vanga harsatna tâwk naupang 50 enkawl mek an ni a; naupang enkawl tawh zingah mahnia hna thawka intodelh te, nursing zir mek leh zir chhuak tawhte an awm.

Lucy Remruati chuan, Community Support Programme (sponsorship) an kalpui thu sawiin, "Sponsorship kaltlang hian Aizawl, Lunglei, Champhai, Mamit, Kolasib leh Saitual district-ah HIV/AIDS vanga harsatna tâwk naupang 300 leh chhungkua 120 tan ṭanpuina pein kan tlawh kual ṭhin a, thla tin an zirna senso, ei leh in bakah damdawia inenkawlna kan tumsak ṭhin," a ti.

Ṭanpuina bakah, anti retroviral therapy (ART) damdawi an sem a, HIV/AIDS vanga nausen harsatna tâwkte tan hnute tui (formula milk) an pek ṭhin thute sawiin Lucy Lalremruati chuan, "Ṭanpuina hi central aṭangin kan dawng a, a tam lo a, tun ang dinhmuna kan din theih chhan chu Mizorama kohhran, khawtlang, NGO leh mimal hrang hrang ṭanpuina min petute vang a ni," a ti a, ṭanpuina an dawn ṭhinah an lawm thu a sawi.