NH-302 kawng siamtute chawlhtirtute Lunglei District Magistrate-in a vau

Land Owners Coordination Committee on NH-302, Lungsen & Rangte VC Area-in zangnadawmna an la dawn kim loh avanga May 6, Thawhṭanni aṭanga an huam chhunga NH-302 kawng zauh hna thawktute an chawlhtir chungchangah Lunglei District Magistrate chuan nimin khan thuchhuah a siam a, "Zangnadawmna la dawng lote ram tih loah chuan kawngpui siamṭhat hna hi chhum lo chat loin a kal tur a ni," a ti.

Lunglei district magistrate Ramdinliani chuan, sorkar laipui hmalakna pawimawh tak kal mek chawlhtir tumna a awm chu an ngai thutak hle tih a tarlang a; Land Owners Coordination Committee on NH-302, Lungsen & Rangte VC Area resolution (08.04.2024) chu Competent Authority for Land Acquisition (CALA) leh Additional DC ni bawkin 15.04.2024 khan ziakin a chháng tih sawiin, "NH-302 kawngpui zauh hna kal mekin ram a tihchhiat tawh emaw, a tihchhiat tur ram neitu, tun thlenga zangnadawmna la dawng lote'n a rang thei ang bera zangnadawmna an dawn turte an dawn theih nana hma a lak dante a hrilhfiah tawh," a ti.

Zangnadawmna la dawng lote'n an dawn theih nana hmalakna a kal mek lai leh hmalak dan inhrilh a nih hnu lawka hna thawktute chawlhtir tum a ni chu pawi a tih thu tarlangin Lunglei DC chuan, "NH-302 kawngpui zauh leh siam hna kal mek hi he kawngin a paltlang khuate chauh ni lo, Lunglei district mipui nghahhelh em em a ni," a ti a; fûrpui thlen hmaa a tam thei ang ber thawk turin NHIDCL leh contractor-te nawr mek an nih thu a tarlang.

NHIDCL-in estimate an thehluhte chu a rang thei ang bera enfiah a, dik lo laite CALA-te nena sawiho a, assessment leh estimate-te chu an hotu sang lama thehluh vat an intiam niin a tarlang bawk.

Ramdinliani chuan, "NH-302 kawngpui zauh hna chu chàwl loa a kal theih nan Lungsen leh Rangte VC huam chhungah pawh zangnadawmna la dawng lote ram tih lohah chuan kawngpui siam hna chhum lo chat loin a kal tur a ni. Hna kal mek tikhaihlak leh tibuai zawnga khawsa an awm a nih chuan an chungah dan angin hmalak a ni ang," a ti.