Mizoramah ASF vangin kuminah vawk thi leh suat 643 a awm tawh

Kuminah January 1 aṭanga nimin thleng khan vawk pûl hri, African Swine Fever (ASF) kaihhnawihah Mizoramah vawk 643 a thi tawh a, chu'ngte chu ASF hri vanga thi 478 leh vawk suat 165 a ni.

Animal Husbandry & Veterinary department chhinchhiah chinah, January 1 aṭanga nimin thleng khan district pangaa khua/veng 23-ah ASF vangin vawk 478 a thi a, vawk 165 suat niin, ASF kaihhnawiha kumina vawk thi zawng zawng chu 643 a tling.

Kumina ASF vanga vawk thi, suat leh vawk hri lênna hmun (infected area) tamna ber Aizawl district-ah nimin thleng khan khua/veng 16-ah vawk 189 a thi tawh a, chu'ng zinga veng 14 chu Aizawl Municipal Corporation huam chhunga mi a ni.

Aizawl district-ah hian vawk hri darh zel tur vên nan infected area-a puan tawh huam chhungah AH&Vety department hriatpuinain vawk 82 suat a ni tawh a; ASF kaihhnawihah Aizawl district-a vawk thi leh suat chu 271 a ni tawh.

Khawzawl district-a Dulte khuaah ASF vanga vawk thi leh suat 129 awm tawhin, Aizawl district dawta ASF vanga vawk thi tamna ber district a ni a; Dulte khua hi kumina ASF vanga vawk thi tam berna khua ni bawkin, Dulte khuaah hian nimin thleng khan hri vanga thi vawk 115 leh vawk suat 14 a awm tawh a ni.