Khuanglengah Rural Haat hawng

Khuangléng khuaa thlai thar, sa leh kut them­thiamna hmanga thil deh­chhuahte zawrhna tur Rural Haat chu Champhai DC James Lalrichhana chuan nimin khan a hawng.

Rural Haat-ah hian inzawrhna tur ṭhutna 24 a awm a, tui litre 2,000 lenna tuizém dah a ni bawk. Rural Haat hi National Bank for Agriculture and Rural Development (NABARD) sum Rs 15,00,000 leh Northeast Initiative Deve­lop­ment Agency sum Rs 75,000 hmang sak a ni.

Champhai DC chuan, hlâwk zawka buh leh bâl thar a nih theih nan mithiamte ráwn chunga kal turin Khuanglenga kut hnathawktute a chah a, "Khawtual mai ni lo, ram páwn thlenga thawn chhuah theih tur market ngaihtuah chungin hma la ang che u," a ti a; Rural Haat enkawl uluk tur leh venhimnaah neitu thinlung pu turin khawtlang mipui a chah.

Champhai district agriculture officer R Lalramhluni pawhin thu sawiin, Champhai district chu Mizoramah tlang ram lo neih uarna ber a nih thu a sawi a, "Kum tina hmun dang bawh zel loa hun rei zawk leh kumhlun zawka hmun ngaia lo neih a nih theih nan tunlai thiamna, hlo tûr leh leiṭha hmanga ṭan lak tum turin khawtlang mipui ka sawm a ni," a ti.

Khuanglengah hian chenna in 428 vel awmin, mi 2,300 vel an cheng mek a ni.