Assam Rifles ram bul kawngpui sira tuihâwk luankawr ṭha lo laite enfiah

Minister of state B Lalchhan­zova chuan nimin zing khan a bial chhung, Dawrpui veng huam chhunga 2nd Assam Rifles ram bul kawng­­pui sira tuihâwk luan­kawr (side drain) ṭha lote a enfiah a, tuihâwk luan­kawr an hai fai nghal.

Assam Rifles ram bul kawngpui sirah tuihâwk luankawr a ṭhat tawk loh avangin ruah a sûrin kawngpuiah tui a tling ṭhin a; tui a tlin tawh loh nan nimin zing khan PWD lamin an hai fai a, bialtu MLA B Lalchhanzova'n a ṭawiawm a ni.

B Lalchhanzova chuan, Assam Rifles ram dâwltu lung bang awm phei, Bazar Bungkawn aṭang Treasury Square traffic point thlengin fai leh mawi taka enkawl a ṭul thu a sawi a, "Sorkar department hrang hrangte nen a theih anga anga thawkhoin, a ṭul angin MLA fund hmang pawha thawh kan tum a ni," a ti.

Assam Rifles awmna leh a bula kawngpui chu Aizawl hmél lanna pawimawh a nih thu sawiin Lalchhanzova chuan, "A mawiin a fai hle tur a ni. Rawngte hnawihin chei mawi a ni ang a, pangparte dahin hmuh nuam taka siam tum a ni," a ti a; Aizawl khawpui thianghlimna leh mawinaa mawhphuraa inngai mimal leh pawlte chu thawhhopuiah a sáwm.

Aizawl East-II bialtu MLA chuan, "He lai hmunhma felfai zawka enkawl tur hian Assam Rifles leh DC lamte nen pawh sawiho tawh a ni a, lungrem phei chei mawi leh tihfai kawngah thawhhona thuthlungte pawh siamin hmalak tum a ni," a ti bawk.

Nimin zinga tuihâwk luankawr enfiah leh tihfainaah hian PWD Aizawl Road North Division-a hotu te, 2nd Assam Rifles Deputy Commandent leh an mi leh sa te, Dawrpui aṭangin Local Council, YMA leh Dawrpui South Welfare hruaitute an tel a ni.