Transport enforcement staff-te'n dan bawhchhia mi 275 an man
Transport enforcement staff-te chuan April 2024 chhung khan Aizawl district-ah dan bawhchhia mi 275 an man a, chu'ng mite pawisa chawi tling khawm chu Rs 10,19,000 a ni.
Aizawl District Transport Office hnuaia enforcement staff-te chuan April 2024 chhung khan hmun hrang hrangah lirthei 1,340 an endik a, danin a phût ang document nei lo mi 275 an man.
Lirthei an man zinga tam ber chu bungraw phur lirthei niin, 77 an man a, a dawttu chu maxicab niin, 44 an man a, LMV 47 leh lirthei lian (heavy goods vehicle) 40 an man bawk. April thla chhung hian two wheeler dan bawhchhia pakhat chiah an man a ni.
Lirthei mante dan bawhchhiat tam ber chu insurance leh document dang, dam hun chhung nei, document thi tawhte a ni a; phurh theih zat aia tam phur te, tlan theih lohna china phalna nei loa tlânte an man nual bawk. Lirthei an man, manna hmuna pawisa chawi tur pe nghal thei lote chu e-challan hmanga chhinchhiah ṭhin a ni.
Transport department hotute chuan, bungraw phur chi lirtheiah passenger neih phal a ni lo ang bawkin, passenger phur chi lirtheiah sumdawnna bungrua leh ran phurh phal a ni lo tih an sawi a; mahni lirthei number (registration) ang nei lirthei dang hriate chu an awmna aṭanga DTO hnai berah hriattir turin an chah bawk.