KHAWTHLIR

CMRF atan hlân

Mizoram Truck Driver Association hruaitute chuan nimin khan chief minister Lalduhoma a pisaah an hmu a, Chief Minister's Relief Fund (CMRF) atan Rs 20,000 an hlàn. Mizoram Class IV Contractors Association hruaitute pawhin nimin vêk khan Chief Minister hmuin, CMRF atan Rs 10,000 an hlàn bawk. CM Lalduhoma chuan, CMRF sum chu ṭanpui ngaite hnenah pek ṭhin a nih thu sawiin, "A ṭangkai ṭhin hle a ni," a ti.

Lawmthu sawi

ZPM Upa Committee chuan thuchhuah siamin, kum lama upate (senior citizen) tan sorkar damdawi-ina inentirna card (rawng hran) siamsak tura Health minister Lalrinpuii an ngennaah hma a la nghal a, tihhlawhtlin a nih tur thu a sawi avangin lawmawm an tih thu an tarlang. Tar pension (Old Age Pension) buaipui tura Mizoram Upa Pawl kuta dah tura an ngenna pawh bawhzuisak a tum thu a lo hrilh avangin lawmawm an tih thu an sawi bawk.

AR-in meth man

Assam Rifles chuan May 6, Thawhṭanni khan Mêlbûk huam chhungah maxicab aṭangin methamphetamine kg. 2.163 an man a, a neitu pawh an man tel nghal. Meth an man hi cheng vbc. 6.48 hû a ni a, Zokhawthar Police Station-ah an hlan a ni. AR sipaite hian Champhai-Aizawl kawngah ram dang meizial báwmpui 20 an man bawk a, cheng nuai 26 hû a ni.

In saksak

April 9, 2024-a Mamit Dinthar kâwna in kâng ral ta neitu Lungtiawii chu YMA, Mamit Hmarveng Branch ruahmannain a hmun ngaiah sak ṭhat mek a ni. In hi a dung ft. 24 leh a vâng ft. 18-a zau sak a ni a, in sakna atan Disaster Management & Rehabilitation department aṭangin Rs 1,30,000 hmuh a nih bakah, Hmarveng Branch YMA-in vehbûr an khawn a ni.

MZU-ah zirhona

Mizoram University Psychology department chuan nimin khan MZU School of Social Science Deans Hall-ah 'Stress management workshop' an huaihawt. MZU Psychology department assistant professor Dr Sabiha Alam Choudhury-in mihringa hahna/ipikna (stress) leh hlauhna (anxiety) thlen dan leh taksa leh rilru a nghawng dante a zirtir a; stress leh anxiety chhâwk dan leh rilru sawizawi dante a taka tih a ni bawk.