Mizo bawngsa zuarte'n May 13 hnuah zuar tawh lo turin hnam dang an chah

Mizo Bawngsa Zuar Association (MBZA) hruaitute chuan nimin khan Aizawl Press Club-ah thuthar thehdarhtute an kâwm a; Mizorama hnam dangte'n inner line permit (ILP) pek an nih anga hmang loa bawngsa zuar an awm thu leh an ngaimawh thu an sawi a, May 13, 2024 hnu lamah zuar tawh lo turin an chah.

MBZA president Lianhmingthanga chuan, hun eng emaw ti aṭangin Mizoramah hnam dang bawngsa zuar hmuh tur an awm tih sawiin, "Tun hnai deuhah an pung nasa a, veng ṭhenkhatah Pathianni pawh zah loa zuar hmuh tur an awm ta fo. Hnam dang bawngsa zuarte hian phalna an neih hriat a ni lo a, an ILP chhui chian chuan ILP pek an nihna anga hmang lo, cement mistiri, helper leh construction work danga thawk tura rawn lutte an ni tlangpui," a ti.

MBZA hruaitute chuan, May 13, 2024 hnu lamah chuan hnam dang dan loa bawngsa zuarte chu inthiarfihlim tur leh bawngsa zuar tawh lo turin an chah a, "Mizo mahni hming hawhtirte leh hnam dang thurualpuitute zawng zawng pawh titawp turin kan inhriattir a ni. He thu ngai pawimawh loa ti luite chu an chungah eng pawh thleng se an sawi buai thei lo ang," an ti a; an hmalakna ṭawiawm turin khawtlang hruaitute leh mipui an ngen.

MBZA President chuan, Mizoramah phalna nei loa hnam dang sumdawn phal a ni lo tih sawiin, "Dan palzûtna leh ram leilung fate chanvo inchhuhsakna lian tak a ni. Mizorama bawng talha eizawnna hi ram leilung fate ngeiin kan kalpui a ṭha kan ti a, hnam dang kuta he eizawnna a awm tur leh an kuta sum leh pai luang lut nasa lutuk hi kan ram leh hnam tan a him lo," a ti a, Mizo mipui ṭan rual a ṭul thu a sawi.

MBZA TARLAN DANGTE

☑ Bawng talha eizawng Mizo zingah hnam dang thurualpuia hum tlat te, mahni hming hawhtira sumdawnna kalpui eng emaw zat an awm.

☑ Dan kalha hma la duh, ram leilung fate hamṭhatna leh chanvo tur an chhuhsak theihna tura ke lo pên duh an awm hi a lungchhiatthlak.

☑ Bawng talha sumdawnna hi ram leilung fate ni lo, phalna nei loa hnam dangin sumdawn nan an lo hman kan remti lo.