MNF MLA-te'n SASCI chungchangah mipuia ngaihdam dil turin CM an phût; 'ZPM kalphung thar hi a mak hle' - MLP

MNF Legislature Party (MLP) member-te chuan Special Assistance to States for Capital Investment (SASCI) sum kîr (lapse) chungchanga thu dik lo sawiah chief minister Lalduhoma puhin, mipui hnena ngaihdam dil turin an phût a; ZPM kalphung thar chu mak an tih thu an tarlang.

MLP member-te hian nimin khan Aizawl Press Club-ah thuthar thehdarhtute an kâwm a; an leader Lalchhandama Ralte chuan, Chief Minister-in May 3, 2024-a thuthar thehdarhtute a kawmnaah thu dik lo a sawi niin a sawi a, "CM zahawm tak hian kum 2022-23 SASCI Part-I sum cheng vbc. 200 a lapse anga a sawi kha chu thu dik lo a ni. Hemi kum hian Mizoram tan cheng vbc. 400 sanction a ni a, cheng vbc. 400 man hna chu tender vekin contractor-te'n ṭha takin an thawk," a ti.

Lalchhandama Ralte chuan, kum 2022-23 sorkar kumah second instalment chhuak hman lo mah se, hna thawh vek a nih avangin cheng vbc. 200 chu a kum lehah a hma kuma unpaid bill pek nan Finance Ministry-in a pe leh vek nia sawiin, "Kum 2022-23 a hmuh tur cheng vbc. 400 chu a kimin Mizoramin kan hmu a, lapse a awm lo. Bill pe tur pawhin MNF sorkar khan harsatna a nei lo," a ti a, project zawng zawng ṭha taka thawh vek a nih thu a sawi.

MLP Leader chuan, kum 2023-24 ah Finance Ministry-in Mizoram tan SASCI Part-I hnuaiah cheng vbc. 500 allocation a pek thu sawiin, "A hma kuma unpaid bill pek tlâkna atan cheng vbc. 200 additional sanction a tel. MNF sorkar lai September 9, 2023 khan kum 2023-24 atana SASCI Part-I sum cheng vbc. 462.255 dawn a ni a, chumi hnu February 2, 2024-ah Finance department-in cheng nuai 414 a dawng leh," a ti.

Cheng vbc. 462.55 aṭangin MNF sorkarin implementing department-ah cheng vbc. 266.69 a pe nghal nia sawiin Lalchhandama chuan, "Model Code of Conduct a awm zui tâk avangin Finance department-in a kawl zui. December 2023 tirah ZPM sorkar thar a piang a, sorkar hmasain dan ang thlapa PWD register contractor a ruatte hna thawk hlei thei loin a siam," a ti a, ZPM sorkarin first instalment sum cheng vbc. 266.69 pe chhuak loin a kawl táng lui niin a sawi.

MNF Legislature Party member-te chuan, ZPM sorkarin hna thawk hleithei loin contractor-te a siam nia sawiin, "Contractor-te hna chhuhsak tuma an innawr chhung a rei hle. SASCI contractor-te'n PWD-ah joint representation an submit hial. Heti chung hian Assembly session-ah zahpah nei miah loin contractor work order nei tawhte an tibuai lo niin an sawi hmiah hmiah. ZPM sorkar hian PWD officer-te an tikhawngaihthlak hle," an ti.

SASCI sum lapse chhan ber chu ZPM sorkarin dan ang thlapa hna pek contractor-te chhuhsak a, an party mite pek an tum vang nia sawiin MLP member-te chuan, "Cheng vbc. 233.31 lapse hi a tam tham em em a, veng leh khaw tam takin an tuar dawn. Sorkar a inthlak fo a, sorkar hmasa hna pek sa inchhuhsak a awm ngai loa hriat a ni. ZPM kalphung thar hi a mak bik hle," an ti a; sum lapse chhanah Chief Minister an puh a ni.