Chanchinbu semtute'n minister chawimawi

Mizoram Chanchinbu Semtu Pawl (MCSP) chuan May 7, Thawhlehni khan Vanglaini editor hlui K Sapdanga, minister chu a pisaah chawimawina an hlân. Minister chuan, khawvel pumah TV leh internet-in chanchinbu rún mah se, a hneh thei ngai lo tih a sawi.

K Sapdanga chuan, chanchinbu sem hna chu hna tláwm a nih loh thu sawiin, "Kan zinga mi ṭhenkhat chu mi hlawhtlinga puan, Thangchhuah Tlang lehkhabua chawimawi tlemte zingah kan tel. Chanchinbu hi khawvel pumah TV leh internet-in rún mah se, a hneh thei ngai lo a, a tàwpah chuan mipui hi chanchinbuah an kîr leh zel a, tunah pawh hian khawvelin 'Chanchinbu nge nge chu a rintlak ber e' tiin an kîr leh mek a ni," a ti.

MCSP president PB Shiana chuan, Home minister ni ta K Sapdanga hnuaiah kum 30 chuang a thawh tawh thu sawiin, "Ngaihdamna leh dawhtheihna a ngahzia hi sawi thiam sèn a ni lo. Amah avangin in leh lo kan nei a, kan fate'n lehkha an zir theih phah a, an zarah chhungkaw za tam takin ei leh bàr kan hmu a ni," a ti a; mi dang tam tak pawhin K Sapdanga zarah chhungkua an chàwm theih phah thu a sawi.